فەرمانی دەستگیركردن بۆ 35 جووتیاری گوندی تەپەسەوز دەرچووە

ئاڤا نیوز

جووتیارانی گوندی تەپەسەوزی سەر بە ناحیەی لەیلان، ڕێگری لە هێزە ئەمنییەكان دەكەن كە هاتوون زەویوزارەكانیان لێ داگیربكەن.

چیرۆكی سەرەكی: ژمارەیەك عەرەبی هاوردە، بە پشتیوانیی سێ هێزی جۆراوجۆر و دادوەرێكی دادگای دووز، ڕوویان لە سنووری گوندی تەپەسەوز سەر بە ناحیەی لەیلان لە پارێزگای كەركووك كرد، بە مەبەستی پڕكردنەوەی بەڵێننامە بە جووتیارانی گوندەكە و دەست بەسەرداگرتنی ئەو زەوییانە كە گوایە بە بڕیاری دادوەر، دراونەتە عەرەبی هاوردە.

چی ڕوویدا: جووتیارە كوردەكانی گوندی تەپەسەوز، خێوەتی ناڕەزایییان هەڵداوە و ڕێگای چوونی هێزەكانیان بەرەو زەوییە كشتوكاڵییەکان گرت و ڕژدن لەسەر ڕادەست نەكردنی زەویوزارەكانیان.

زانیاریی بەدەستهاتوو: بەپێی زانیاریی پەیامنێرمان لە كەركووك، دیار محەممەد، بەبیانووی ڕادەست نەكردنی زەوییە كشتوكاڵییەكان بە عەرەبی هاوردە و، جێبەجێنەكردنی فەرمانی دادوەر، فەرمانی دەستگیركردن بۆ سێ جووتیاری بەساڵاچووی كورد دەرچووە كە تەمەنیان لەنێوان 52 ساڵ تاوەكو 80 ساڵییە.

 

باكگراوند: لە ماوەی ڕابردوودا، بە بڕیاڕی دادوەر زیاتر لە 500 دۆنم زەویی جووتیاران بە عەرەبی هاوردە درا، کە حەوت پارچەزەوی لەخۆدەگرێت، تاوەکو ئێستاش لەم گوندە زیاتر لە 35 جووتیار فەرمانی دەستگیرکردنیان بۆ دەرچووە، لە کاتێکدا زەوییەکان موڵکی خۆیانە.