لە شاخی ئەزمەڕی سلێمانی کۆپتەرێک و ئۆتۆمبێلێک کەوتنە خوارەوە

ئاڤا نیوز

ئۆتۆمبێلێک لە شاخی ئەزمەڕ کەوتە خوارەوە و کەسێک گیانی لەدەست دا، تیمێکی فڕۆکەوانیش کە بۆ هێنانەوەی تەرمەکە گەیشتنە شوێنی ڕووداوەکە کۆپتەرەکەیان تێکشکا و دوو کەس زامدار بوون.

زانیاریی بەدەستهاتوو: ئۆتۆمبێلێک لە شاخی ئەزمەڕ لە شاری سلێمانی کەوتووەتە خوارەوە و بەو هۆیەوە شۆفێرەکەی گیانی لەدەستداوە، دواتر تیمێکی فڕۆکەوانیی هاتووچۆی سلێمانی بەمەبەستی هێنانەوەی تەرمەکە دەچنە شوێنی ڕووداوەکە بەڵام بە هۆی سەختیی شوێنەکە و لەکاتی لەنگەرگرتندا هەلیکۆپتەرەکە تێکدەشکێت.

زانیاریی زیاتر: بەهۆی تێکشکانی هەلیکۆپتەرەکە دوو کەس لە تیمی فڕۆکەوانی زامدار بوونە بەڵام برینەکانیان سووکە.

لێدوانی فەرمی: قودسی ئیسماعیل ، پورزای شۆفێرەکەیە بە ئاڤا میدیای ڕاگەیاند: شۆفێرەکە لە تاوەرێکی سەر شاخی ئەزمەڕ کار دەکات و کاتژمێر (8:00) ڕۆیشتووە و ئەو شوێنەی کە ڕووداوەکەی لێ ڕووداوە چەند خولەکێک دوورە بەڵام نازانین ئاخۆ بەدیارکراوی کاتژمێر چەند ڕووداوەکە ڕووی داوە و ئێمە نیوەڕۆی ئەمڕۆ زانیومانە، شوێنەکە سەخت بوو نەمانتوانی تەرمەکە بهێنینە سەرەوە بۆیە تیمی فڕۆکەوانیی هاتن بەڵام بە هۆی سەختیی شوێنەکە فڕۆکەکەش لەکاتی لەنگەرگرتن تێکشکا.

ئەمەش بزانە: شۆفێرەکە ناوی ئەحمەد ڕەسووڵ عیسایە و تەمەن 52 ساڵ بووە، خەڵکی گوندی غەمزە و دانیشتووی شاری سلێمانی بووە.