ئاڤا هۆکاری کەوتنەخوارەوەی هێلیکۆپتەرەکەی سلێمانی ئاشکرا دەکات

ئاڤا نیوز

 

هاتووچۆی سلێمانی ڕایدەگەینێت، لە ڕووداوی کەوتنەخوارەوەی هێلیکۆپتەرێکی فریاگوزاری تەنیا دوو کەس بریندارن و ئەوەی گیانی لەدەستداوە شۆفێری ئەو ئۆتۆمبێلە بووە کە لە شاخەکە هەڵدێرا بوو. هۆکاری زانراوی ڕووداوەکە بوونی بایەکی بەهێز بووە لەو کاتە.

چیرۆکی سەرەکی: بەیانیی ئەمڕۆ لە شاخی هەڕووتە نزیک ئەزمەڕ لە سلێمانی. ئۆتۆمبێلێک هەڵدێرا و شۆفێرەکەی بەناوی (ئەحمەد ڕەسووڵ) گیانی لەدەست دا. دەوترێ کارمەندی کۆمپانیای پەیوەندی بووە و دەوامی لەسەر شاخەکە بووە. دوای نیوەڕۆ تیمێکی فریاگوزاریی سلێمانی بە هێلیکۆپتەری فریاگوزاری بۆ هێنانەوەی تەرمی ئەو شۆفێرە دەچنە شوێنەکە، بەڵام هیلیکۆپتەرەکە دەکەوێتە خوارەوە و هەردوو کاپتنی هیلیکۆپتەرەکە بریندار دەبن.

 

زانیاریی بەدەستهاتوو: ژیوار عەبدولرەحمان، پەیامنێری ئاڤا لە نزیک شوێنی ڕووداوەکەیە ڕایگەیاند، ژمارەیەکی زۆری تیمی فریاگوزاری لەوێن، هەردوو کاپتنی هێلیکۆپتەرەکە گواستنراونەتەوە نەخۆشخانە و مەترسیان لەسەر نەماوە و تەرمی شۆفێری ئۆتۆمبێلەکەش گواستراوەتەوە پزیشکی دادی سلێمانی.

 

ڕاگەیێنراوی فەرمی: هاتووچۆی سلێمانی ڕایگەیاند، هەردوو فڕۆکەوانەکە گواستراونەتەوە نەخۆشخانەی شار، یەکێک لە فڕۆکەوانەکان عەمید حسێن فیزوڵڵایە، ئێستا باری تەندروستییان جێگیرە.

هۆکارە زانراوەکان: بەگوێرەی بەدواداچوونی ژیوار عەبدولرەحمان، پەیامنێری ئاڤا، هۆکاری کەوتنەخوارەوەی هێلیکۆپتەرەکە بوونی 'با'یەکی بەهێز بووە. ئەمە وای کردووە هێلیکۆپتەرەکە نەتوانێت لەنگەر بگرێت و تێکشکاوە. تەنانەت 10 بۆ 12 مەتر لە ئۆتۆمبێلەکە نزیک بووەتەوە.