هێزەکانی ئەمریکا بە تەواوی لە عێراق دەکشێنەوە؟

ئاڤا نیوز

 

ئەمریکا بەردەوامە لە کشاندنەوەی سەربازەکانی لە بنکەکانی عەین ئەسەد و ڤیکتۆریا و بەم زووانە بوونی هێزەکانی ئەو وڵاتە لە عێراق جگە لە هەرێمی کوردستان، کۆتایی دێت.

 

لێدوانی فەرمی: سەگڤان سندی، ئەندامی لیژنەی ئاسایش و بەرگریی پەرلەمانی عێراق بە ئاڤا میدیای ڕاگەیاند: هێزەکانی ئەمریکا بەردەوامن لە کشانەوە لە بنکەکانی عەین ئەسەد لە ئەنبار و ڤیکتۆریا لە نزیک فڕۆکەخانەی بەغدا و لە ماوەیەکی نزیکدا بە تەواوی هێزەکان ئەو بنکانە جێدەهێڵن.

 

لەلایەکی دیکەوە: سەرچاوەیەکی ئاگادار بە ئاڤا میدیای ڕاگەیاند: بەشێکی هێزەکانی ئەمریکا لە عێراق دەکشێنەوە، بەرەو بنکەکانی ئەمریکا لە ڕۆژئاوای کوردستان - سووریا دەچن.

 

زانیاریی زیاتر: هاوکات بەشێکی زۆر لەو سەربازانەی ئەمریکا لە عێراق، دەگوازرێنەوە بۆ بنکەی سەربازیی ئەو وڵاتە لە هەولێر، ژمارەی سەربازەکان لە زیاتر لە دوو هەزار سەربازەوە بۆ کەمتر لە 500 سەرباز لە هەولێر کەم دەبێتەوە.

 

ئەوەی پێویستە بیزانیت: ئەمریکا نزیکەی دوو هەزار و 500 سەربازی لە عێراق و 900 سەربازی لە سووریا هەیە، ئەمەش لە چوارچێوەی ئەو هاوپەیمانییەی لە ساڵی 2014 بۆ بەرەنگاربوونەوەی داعش پێکهێنرا.