ڕووسیا: لێدوانەکانی ماکرۆن شایستەی سەرۆکی وڵاتێک نییە

ئاڤا نیوز

ڕووسیا دەڵێت، قسەکانی ئیمانوێل ماکرۆن، سەرۆکی فەرەنسا، کە ڤلادیمێر پووتین، سەرۆکی ڕووسیا بە "دێوێک لە دەروازەکانمان" ناوبرد، شایستەی سەرۆکی وڵاتێک نییە.

 

چیرۆکی سەرەکی: هەفتەی ڕابردوو ئیمانوێل ماکرۆن، سەرۆکی فەرەنسا لە چاوپێکەوتنێکدا ڕەخنەی تووندی لە ڤلادیمێر پووتین، سەرۆکی ڕووسیا گرت و ئەوی "دێوێک لە دەروازەکانی ئەوروپا" ناوبرد.

 

لێدوانی فەرمی: ماریا زاخارۆڤا، وتەبێژی وەزارەتی دەرەوەی ڕووسیا ڕایگەیاند، ماکرۆن بەردەوام لێدوانی سەیر و سەمەرە دەدات کە هەندێک جار سنووری ڕێز تێدەپەڕێنێت و دەگۆڕێت بۆ سووکایەتی و ئەمە شایستەی سەرۆکی وڵاتێک نییە.

 

بۆچوونی لایەنی بەرامبەر: ئیمانوێل ماکرۆن، لە کۆنفرانسێکی ڕۆژنامەوانی وەڵامی ڕووسیای دایەوە و ڕایگەیاند، کە ئەو هەرگیز قسەی ناشرینی نەکردووە، بەڵکوو تەنیا ئەوەی وتووە کە زۆرێک لەو وڵاتانەی کە لە دەیان ساڵی ڕابردوودا لەلایەن ڕووسیاوە داگیرکراون، هەستی پێدەکەن.