درووزەکانی سووریا داوای "مافی چارەی خۆنووسین" دەکەن

ئاڤا نیوز

جارێکی دیکە دانیشتوانی درووز نشینی پارێزگای سوەیدا لە سووریا دەستیان بە خۆپیشاندان کردەوە داواکاریی سەرەکیشیان "مافی چارەی خۆنووسین"بوو لە سووریا.

وێنە گەورەکە: ناوەڕاستی مانگی تەمموز ڕووبەڕووبوونەوەیەکی خوێناوی لەنێوان پێکهاتەی درووزەکان لە پارێزگای سوەیدا و هێزەکانی سەر بە حکومەتی سووریا ڕوویدا، لە ئەنجامیشدا زیاتر لە هەزار و 600 کەس کوژران و دەیان هەزار کەسیش ئاوارەبوون.

چیرۆکی سەرەکی: پارێزگای سوەیدا لە باشووری سووریا، کە زۆرینەی دانیشتوانی دروزن، ئەمڕۆ شەممە خۆپیشاندانی نوێی بەخۆیەوە بینی. خۆپیشاندەران داوای "مافی چارەی خۆنووسین"یان دەکرد.

بڵاوکراوەی فەرمی: پلاتفۆرمی هەواڵی ناوخۆیی "سوەیدا 24" ڕایگەیاند: "خۆپیشاندانێکی جەماوەری لە شاری شەهبا لە باکووری سوەیدا بەڕێوەچوو، هاوکات لەگەڵ خۆپیشاندانێک لە گۆڕەپانی کەرامە لە شاری سوەیدا، بۆ داواکردنی مافی چارەی خۆنووسین."

ئەوەی پێویستە بیزانیت: ئەم خۆپیشاندانە دوای لێدوانەکەی حیکمەت هیجری، یەکێک لە گەورە شێخەکانی درووز لە سوەیدا دێت، کە داوای لە وڵاتان کردبوو پشتگیری بکەن بۆ دامەزراندنی "هەرێمێکی سەربەخۆ" لە باشووری سووریا.

لەلایەکی دیکەوە: چەند ڕۆژێک لەمەوبەر، گرووپە ناوخۆییەکانی سوەیدا دامەزراندنی قەوارەیەکی سەربازییان بە ناوی "پاسەوانی نیشتمانی" ڕاگەیاند و وەفاداری تەواوی خۆیان بۆ حیکمەت هیجری دووپاتکردەوە.

ئەوەی لەبارەیەوە دەگوترێت: ڕۆژی پێنجشەممە، میدیاکانی ئیسرائیل لەسەر زاری بنیامین ناتانیاهۆ، سەرۆکوەزیرانی ئیسرائیل بڵاویانکردەوە کە ئیسرائیل کار بۆ دروستکردنی ناوچەیەکی بێ چەک دەکات لە بەرزاییەکانی جۆلانەوە تا سوەیدا لە باشووری سووریا.