تەندروستیی غەززە: 10 کەسی دیکە بەهۆی برسیبووەنەوە گیانیان لەدەستداوە

ئاڤا نیوز

تەندروستیی کەرتی غەززە ئاماری 24 کاتژمێری ڕابردووی بڵاوکردەوە کە تیایدا هاتووە، 10 کەسی دیکە بەهۆی برسیبوونەوە گیانیان لەدەستداوە کە سێ لەوانە منداڵن و تووشی بەدخۆراکی بوون. 

وێنە گەورەکە: نزیکەی شەش مانگە، ئیسرائیل گەمارۆی کەرتی غەززەی داوە و بەشێوەیەکی "زۆر" سنووردار نەبێت ڕێگە نادات هاوکارییە مرۆییەکان بگەنە نێو کەرتەکەوە، بەهۆی ئەمەوە هەزاران هاووڵاتی خۆراکی پێویستییان دەست ناکەوێت و بەشێکی دیکەشیان تووشی بەدخۆراکی بوون.

ڕاگەیێنراوی فەرمی: وەزارەتی تەندروستیی غەززە ڕایگەیاند؛ ژمارەی گیان لەدەستدان بەهۆی برسیبوونەوە گەیشتووەتە 332 کەس کە 124 لەوانە منداڵن.

لەلایەکی دیکەوە: دەزگای پەخشی ئیسرائیل بڵاویکردەوە، تەلئەبیب بەنیازە لە چەند ڕۆژی داهاتوودا، گەیاندنی هاوکاریی مرۆیی لە ئاسمانەوە بۆ غەززە ڕابگرێت، هاوکات کاروانی بارهەڵگرەکانیش کەمدەکرێنەوە. 

ئەوەی پێویستە بیزانیت: لەچەند ڕۆژی ڕابردوودا، نەتەوە یەکگرتووەکان و شارەزایانی نێودەوڵەتیی ڕایانگەیاند: بۆ یەکەمجار برسییەتی لە ڕۆژهەڵاتی ناوەڕاست سەریهەڵداوە و ئەمەش لە کەرتی غەززەیە.