سوودانی و ماکرۆن تاوتوێی سەردانەکەی ماکرۆن بۆ بەغدا دەکەن

ئاڤا نیوز

محەممەد سوودانی و ئیمانوێل ماکرۆن پەیوەندییەکی تەلەفۆنی ئەنجام دەدەن و نوێترین پێشهاتەکانی ناوچەکە و ئەگەری سەردانی ماکرۆن بۆ عێراق تاوتوێ دەکەن. 

چیرۆکی سەرەکی: سەرۆکی فەرەنسا لە پەیوەندییەکدا لەگەڵ سەرۆکوەزیرانی عێراق چەندین بابەتی گرنگ تاوتوێ دەکەن یەکێک لەوانە بەرزکردنەوەی توانا هاوبەشییەکانی نێوانیانە لە بوارە جیاجیاکاندا. 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند: سەرۆکوەزیران جەختی لە گرنگی سەردانی ماکرۆن کردووە بۆ عێراق، ئەمەش لەپێناوی بەشداریکردنی لە کۆنفرانسێکی هەرێمایەتیی بۆ تاوتوێکردنی پرسە جیاوازەکانی ناوچەکە لە بەغدا. 

لەلایەکی دیکەوە: عێراق پێزانینی خۆی نیشانداوە بۆ هەڵوێستی فەرەنسا لەبەرامبەر دۆزی کەرتی غەززە، جەختی لەوەشکردووەتەوە کە ئەوەی ئیسرائیل لە فەلەستین دەیکات پێشهاتێکی مەترسیدارە و دۆخی نێودەوڵەتیی ئاڵۆزتر دەکات.

زانیاریی زیاتر: سوودانی هۆشداریی لە مەترسی سەرهەڵدانی شەڕێکی نوێداوە کە هەڕەشەیە بۆ سەر ئاسایش و سەقامگیری ناوچەکە، جەختی لە هەماهەنگی عێراق کردووەتەوە بۆ کارکردن لەگەڵ هاوپەیمانان و ئێران تاوەکو عێراق بەشێک نەبێت لە ململانێکان. 

لەلایەکی دیکەوە: لای خۆیەوە ماکرۆن شانازیی فەرەنسا بە پەیوەندییە ستراتیژییە قووڵەکانی نێوان هەردوو وڵات و خواستی بەردەوامیدان لە پاڵپشتیکردنی عێراق دووپاتکردەوە. هەروەها گفتوگۆ لەسەر سەردانە پلان بۆ داڕێژراوەکەی بۆ بەغدا کرا هاوکات ماکرۆن هیوای خواست سەردانەکەی بۆ بەغدا ئامانجە کردارییەکانی خۆی بپێکێت.

ئەوەی پێویستە بیزانیت: ئیمانوێل ماکرۆن، سەرۆکی فەرەنسا بەنیازە سەردانێکی فەرمی بۆ عێراق بە سەرۆکایەتیی شاندێکی وەزاری ئەنجام بدات کە بە "گەورە" وەسف دەکرێت، بەرپرسانی سەربازی و ئەمنی و ئابووری لەخۆ دەگرێت. بڕیارە لە سەردانەکەدا چەندین ڕێککەوتنی جۆراوجۆری دوو قۆڵی نێوان هەردوو وڵات واژۆبکرێت، دیارترینیان لە بوارەکانی وزە و چەکی سەربازیدا.

ئەمەش بزانە: لە سەرەتای ساڵی 2023، سوودانی ڕێککەوتنێکی هاوبەشی ستراتیژی لەگەڵ ماکرۆن واژۆکرد، کە یەکەم ڕێککەوتنە لە جۆری خۆیدا لەنێوان بەغدا و پاریسدا. ڕێککەوتنەکە 50 ماددەی هاوکاری لەخۆ گرتبوو، دیارترینیان بەرزکردنەوەی هاریکاری ئەمنی و بەرگری و ئاسانکاری بۆ دابینکردنی کەرەستەی سەربازی دروستکراوی فەرەنسا و چالاککردنی ئاڵوگۆڕی زانیاری و هەواڵگری سەربازی نێوان هەردوولا، بەپێی بەیاننامە فەرمییە هاوبەشەکانی هەردوولا.