مەروان محەممەد: 75%ی ئامادەکارییەکانی هەڵبژاردن کراون

ئاڤا نیوز

کۆمسیۆن بۆ جاری سێیەم دەنگدانی ئەزموونی دەکات و بەرپرسی ئۆفیسی هەولێری کۆمسیۆنیش دەڵێت، 75%ی ئامادەکارییەکان کراون.

چیرۆکی سەرەکی: هەڵبژاردنی پەرلەمانی عێراق 11-11-2025 دەکرێت، کۆمسیۆنی باڵای سەربەخۆی هەڵبژاردنەکانی عێراقیش بەپێی خشتەی کاری خۆی ئامادەکارییەکان دەکات، لەو چوارچێوەیەشدا بۆ جاری سێیەم دەنگدانی ئەزموونی بەڕێوەچوو، تیادا سەرجەم هەنگاوەکانی دەنگدان هاوشێوەی پرۆسەی هەڵبژاردن ئەنجامدرا و سەرجەم ئامێر و پێداویستییەکان بەکارهێنران.

لێدوانی فەرمی: مەروان محەممەد، بەرپرسی ئۆفیسی هەولێری کۆمسیۆن بە ئاڤا میدیای گوت: 75%ی ئامادەکارییەکان کراون، ئەوەی ماوەتەوە هەندێ ئامادەکاری ڕۆژی هەڵبژاردن و کارمەندانی سەرسندووقە.

بە وتەی مەروان محەممەد، ئەو کێشە تەکنیکییانەی لە هەڵبژاردنی ڕابردوو هەبوون، بە تایبەت کێشەی خوێندنەوەی پەنجەمۆر لەم هەڵبژاردنە چارەسەر کراون.

پەیوەست بەم بابەتە: ئومێد خۆشناو، پارێزگاری هەولێر وتی: لیژنەی ئەمنی پارێزگای هەولێر ئامادەکاری تەواوی بۆ بەرێوەچوونی هەڵبژاردن کردووە و لەگەڵ کۆمسیۆنیش لە پەیوەندی بەردەوامداین.