کاروانێکی دیکەی هاوکارییەکان دەگاتە سوەیدا

ئاڤا نیوز

ڕۆژی یەکشەممە، کاروانێکی نوێی هاوکاری لە ڕێگای دیمەشق- سوەیدا بە چاودێریی ئۆتۆمبێلەکانی ڕێکخراوی مانگی سووری سووریا گەیشتە سوەیدا.

وێنە گەورەکە: لە ماوەی ڕابردوودا، شەڕ و پێکدادان لەنێوان خێڵە بەدەوییە عەرەبییەکان و هێزەکانی سەر بە سوپای سووریا لەگەڵ چەکدارانی پێکهاتەی درووز لە پارێزگای سوەیدا ڕووی دا، لە ئەنجامدا هەزار و 600 کەس گیانیان لەدەستدا و دەیان هەزار کەس ئاوارەبوون.

زانیاریی بەدەستهاتوو: ئاژانسی "نۆرس پرێس" لە سەرچاوە ناوخۆییەکان ڕاگەیاندووە، کاروانەکە یارمەتیی خۆراکی تێدایە، جگە لە پێداویستییە خزمەتگوزارییەکان بۆ دامەزراوەکانی ئاو لەوانەش ئامێری پێویست بۆ کارپێکردنی بیرە ئاوییەکان.

زانیاریی زیاتر: چەند ڕۆژێک لەمەوبەر کاروانی هاوکارییە سەرەتاییەکان لە مانگی سوور و ڕێکخراوە نێودەوڵەتییەکان دوای کردنەوەی ڕێگای دیمەشق-سوەیدا چوونە ناو شارەکە، کاروانەکە پێکهاتبوو لە 18 بارهەڵگر.

ئەوەی پێویستە بیزانیت: سەرەڕای کردنەوەی ڕێگای دیمەشق- سوەیدا، هاتنە ژوورەوەی هاوکارییە مرۆییەکان بۆ ناو پارێزگاکە سنووردارە، هیچ گواستنەوە و جووڵەیەک لە نێوان هەردوو پارێزگاکەدا نییە.