چوار سەرۆکایەتییەکە ڕێککەوتن یاسای حەشدی شەعبی بۆ خولی داهاتوو دوابخرێت

ئاڤا نیوز

چوار سەرۆکایەتییەکەی عێراق ڕێککەوتن لەسەر دواخستنی یاسای حەشدی شەعبی و کشانەوەی لە پەرلەمان. ئەندامی چوارچێوەی هەماهەنگی ڕایدەگەیێنێت، ئەم بڕیارە بە ئامانجی پاراستنی سەقامگیری ناوخۆیی و دوورخستنەوەی عێراق لە هەر گرژییەک لە ناوچەکەدا.

وێنە گەورەکە: پڕۆژەیاسای نوێی حەشدی شەعبی لە 18 ماددەی سەرەکی پێکهاتووە و خوێندنەوەی یەکەم و دووەمی بۆ کراوە و تەنیا دەنگدانی کۆتایی ماوە، بەڵام بەهۆی گوشارەکانی ئەمریکا و دژایەتیکردنی بۆ پەسندکردنی یاساکە. دواجار عێراق پاشەکشەی کرد و یاساکەی کشاندەوە.

لێدوانی فەرمی: عودەی خدران، ئەندامی چوارچێوەی هەماهەنگی، بە میدیای عێراقی ڕاگەیاند، دواخستنەکە بە واتای گواستنەوەی دێت بۆ خولی داهاتووی پەرلەمان و حکومەتی داهاتوو نەک هەڵوەشانەوە، چونکە ئەم کارە هەرگیز ڕوونادات، گرنگ نییە چەندە فشارەکان زۆر بن و ئارەزووەکان چۆن بن، جا ناوخۆیی بن یان دەرەکی.

هۆکارە زانراوەکان: یاساکە کێشەیەکی زۆری دروستکردبوو بەهۆی ناکۆکی نێوان لایەنە شیعەکان لەسەر پێکهاتە و ڕۆڵی داهاتووی حەشدی شەعبی. هەندێک لایەن دەیانویست تێکەڵ بە سوپای عێراق بکرێت، بەڵام هەندێکی دیکە دژی ئەمە بوون، هاوکات فشاری ئەمریکاش کاریگەری هەبووە.

ئەوەی پێویستە بیزانیت: ئەمریکا بەئاشکرا دژایەتی خۆی بۆ پەسەند کردنی یاسای نوێی حەشدی شەعبی دەربڕیبوو، پێیوابوو ئەم پڕۆژەیاسایە دەبێتە هۆی بەدامەزراوەییکردنی هەژموونی "ئێران و گرووپە چەکدارە تیرۆریستییەکان، کە ئەمەش سەروەریی عێراق لاواز دەکات."

باکگراوند: حەشدی شەعبی لە ناوەڕاستی ساڵی 2014 بە بڕیاری حکومەت و وەک وەڵامێک بۆ فتوای "جیهادی کفایی" کە لەلایەن مەرجەعی باڵا عەلی سیستانییەوە دوای کەوتنی مووسڵ درا.