کارمەندێکی کارەبای سلێمانی بڕی 500 ملیۆن دیناری هاووڵاتییان دەبات

ئاڤا نیوز

ژمارەیەک هاونیشتمانی لە چەند گەڕەکێکی شاری سلێمانی لە سلێمانی لە ساڵانی ڕابردوو قەرزی کارەبایان لە بەڕێوەبەرایەتیی کارەبا داوەتەوە، کەچی لەسەر پسووڵەکانیان قەرزەکە نەسڕاوەتەوە و هەژمارەکانیان قەرزار ماوەتەوە.

چیرۆکی سەرەکی: ئەو هاونیشتمانیانە داوایان لە ئاڤا میدیا کردووە بە دواداچوون بۆ پرسەکەیان بکات و دەڵێن: لە ساڵی 2021ـەوە تەواوی قەرزەکانمان پاکتاو کردووە، بەڵام لە پسووڵەی مانگەکانی داهاتوو، بۆمان دەرکەوتووە کە هێشتا قەرزارین و قەرزەکانمان نەسڕاوەتەوە، ئەمەش تووشی شۆک کردین.

زانیاریی تایبەت: ئاڤا میدیا زانیویەتی، کارمەندێکی بەڕیوەبەرایەتیی دابەشکردنی کارەبای سلێمانی بڕێکی زۆری پارەی لە خەڵک وەرگرتووە و نەیخستووەتە نێو سندووقی پارە وەرگیراوەکانی کارەبا، بەمەش هاونیشتمانیان پارەکانیان بردراوە و قەرزەکانیشیان لەسەر ماوە.

لێدوانی فەرمی: سیروان محەممەد، وتەبێژی کارەبای سلێمانی بە ئاڤای ڕاگەیاند: هەر هاونیشتمانییەک تووشی ئەو بارودۆخە بووە، با سەردانی بەڕێوەبەرایەتییەکە بکات و نووسراوێکی داواکاری پێشکەش بکات، بەڵام مەرجە لە داواکارییەکەدا کۆپییەکی ئەو پسووڵەیەی هەبێت کە دوای تەواوکردنی مامەڵەکانی وەری گرتووە، لەسەر پسووڵەکە مۆری بەڕێوەبەرایەتیی دابەشکردنی کارەبا هەیە و ڕێکەوتی وەرگرتنی پارەکەی لەسەرە، بەم شێوەیە قەرزەکانی سەر ئەو هاوبەشانە لادەچێت.

ئەوەی پێویستە بیزانیت: ئێستا کەیسەکە لە دەستەی دەستپاکییە و ماوەیەکی زۆرە کارمەندەکەی بەڕێوەبەرایەتیی دابەشکردنی کارەبای سلێمانی دەستگیر کراوە، بەگوتەی ئەو هاونیشتمانیانەی فێڵەکەیان لێکراوە و پارەیان براوە، بڕی پارەکە نزیکەی 500 ملیۆن دینارە بەڵام بەڕێوەبەرایەتیی کارەبای سلێمانی دەڵێت، هیچ بڕێک دیاری نەکراوە، بڕەکە بەپێی سکاڵا و پسووڵەی دەستی ئەو هاونیشتمانیانە دیاری دەکرێت کە سەردانمان دەکەن و پسوڵەکانمان بۆ دەهێنن.

گۆشەیەکی دیکەی دیمەنەکە: هەرچەندە هیچ ژمارەیەکی دیاریکراو لەسەر بڕی پارەکە لەبەردەست نییە، بەڵام یەکێک لە زەرەرمەندبووەکان بە ئاڤای گوت: دەیان ملیۆنان دینارمان لێ خوراوە و داوای چارەسەرکردنی کێشەکەمان لەلایەنە پەیوەندیدارەکان دەکەین.