مادۆرۆ بۆ ڕۆبیۆ: تۆ هەوڵی خوێنڕشتن و لەکەدارکردنی ناوی ترەمپ دەدەیت

ئاڤا نیوز

نیکۆلاس مادۆرۆ، سەرۆکی ڤەنزوێلا ڕایگەیاند، وڵاتەکەی ڕووبەڕووی گەورەترین مەترسی لەشکرکێشی ئەمریکا بووەتەوە کە سەدەیەکە تووشی ئەو هەڕەشە نەبووەتەوە، هاوکات وەزیری دەرەوەی ئەمریکای بەو پەرەسەندنانە تۆمەتبار کرد.

چیرۆکی سەرەکی:  تا دێت گرژییەکانی ئەمریکا و ڤەنزوێلا بەهۆی ناردنی هێز و کەشتی سەربازی بۆ سەر سنووری ئەو وڵاتە زیاتر دەبێتەوە و سەرۆکی ئەو وڵاتەش هۆشداریی دەدات لەوەی وڵاتەکەی ئامادەیە بۆ هەر ئەگەرێک.

لێدوانی فەرمی: نیکۆلاس مادۆرۆ، سەرۆکی ڤەنزوێلا ڕایگەیاند: ''لە ماوەی 100 ساڵی ڕابردوودا وڵاتەکەمان ڕووبەڕووی مەترسییەکی بەم شێوەیە جددی نەبووەتەوە و هەشت کەشتی جەنگی کە بە هەزار و 200 مووشەک و ژێردەریایی ئەتۆمی تەیارکراون، ئامانجیان وڵاتەکەمانە".

هاوکات سەبارەت بە مارکۆ ڕۆبیۆ گوتی، وەزیری دەرەوەی ئەمریکا هەوڵی خوێنڕشتن و  فشارخستنە سەر ڤەنزوێلا و تێکدانی دۆخی ئەمریکای لاتین و ناوی دۆناڵد ترەمپ، سەرۆکی ئەمریکا لەکەدار بکات و شەڕ لەگەڵ خەڵکی وڵاتەکەمان بکات ".

لەلایەکی دیکەوە: مادۆرۆ  داوای ئاشتی و دۆستایەتی لە سەرۆکی ئەمریکا کرد.

قووڵتر: واشنتن، سەرۆکی ڤەنزوێلا بەوە تۆمەتبار دەکات کە سەرۆکایەتیی باندێکی بازرگانیکردنی بە کۆکاین بە ناوی کارتیلی "دێ لۆس سۆلێس"، دەکات کە ئەمریکا وەکو رێکخراوێکی تیرۆریستی دەستنیشانی کردووە، ئەو وڵاتە 50 ملیۆن دۆلاری وەک پاداشت بۆ هەر کەسێک داناوە کە مادۆرۆ  دەستگیر بکات.