کۆمیسیۆنی هەڵبژاردنەکان وادەی پەسەندکردنی ناوی کاندیدەکان ئاشكرا دەکات

ئاڤا نیوز

کۆمیسیۆنی هەڵبژاردنەکانی عێراق بۆ ئاڤا میدیا ئاشكرای کرد، پێش دەستپێکردنی دەنگدانی تایبەت کە دەکاتە ڕۆژی 11-9ـی ئەمساڵ ناوی کاندیدەکان پەسەند دەکرێن و ئەم مانگەش ناوی فەرمانبەرانی سەر سندووقەکانی دەنگدان ڕادەگەیێنرێت.

لێدوانی فەرمی: عیماد جەمیل، سەرۆکی تیمی ڕاگەیاندنی کۆمیسیۆنی هەڵبژاردنەکانی عێراق بە ئاڤا میدیای ڕاگەیاند: ناوی کاندیدەکان لایەنی کەم مانگێک پێش ڕۆژی دەنگدانی تایبەت پەسەند دەکرێت واتە؛ بڕیارە سەرەتای مانگی تشرینی یەکەم وادەی ڕاگەیاندنی فەرمی پەسەندکردنی کاندیدەکان بێت.

ژمارەکان وا دەڵێن: بەوتەی سەرۆکی تیمی ڕاگەیاندنی کۆمسیۆن، تاوەکو ئێستا نزیکەی 700 کاندید بەهۆی نەبوونی مەرجەکانەوە لە کێبڕکێی هەڵبژاردن دوورخراونەتەوە.

زانیاریی زیاتر: عیماد جەلیل دەشڵێت، لە چوارچێوەی ئامادەکارییەکاندا کۆمسیۆن لەم مانگەدا تیروپشک بۆ هەڵبژاردنی کارمەندانی چاودێرییکردنی دەنگدان ئەنجامدەدات، بەڵام وادەکە هێشتا دیاری نەکراوە.

لەلایەکی دیکەوە: نیبراس ئەبو سۆدە، یاریدەدەری وتەبێژی کۆمیسیۆن بە ئاڤای وت: تاوەکو ئێستا زیاتر لە 800 هەزار کەس داوای بوون بە کارمەندیان پێشکەش کردووە، لە کاتێکدا کۆمیسیۆن بۆ بەڕێوەبردنی پرۆسەکە پێویستیی بە زیاتر لە 250 هەزار کەس هەیە، سەرجەم ئەوانەی هەڵدەبژێردرێن ڕاهێنانی هەمەلایەنەیان پێدەکرێت.