سوودانی و فەرماندەی سێنتکۆم جەخت لە پابەندبوون بە کشانەوەی هێزەکانی هاوپەیمانان دەکەنەوە

ئاڤا نیوز

 

ئەمڕۆ لە بەغدا سەرۆکوەزیرانی عێراق و فەرماندەی نوێی فەرماندەیی ناوەندیی ئەمریکا (سێنتکۆم) کۆبوونەوە و چەند پرسێکی ئەمنی و سەربازیی هاوبەشی نێوان هەردوو وڵاتیان تاوتوێ کرد.

 

چیرۆکی سەرەکی: ئەمڕۆ سێشەممە 2-9-2025، محەممەد شیاع سوودانی، سەرۆکوەزیرانی عێراق پێشوازی لە ئەدمیراڵ براد کرووپەر، فەرماندەی نوێی فەرماندەیی ناوەندیی ئەمریکا و شاندێکی یاوەری کرد، بە ئامادەبوونی کارگێڕی باڵیۆزخانەی ئەمریکا لە عێراق.

 

ڕاگەیێنراوی فەرمی:  نووسینگەی ڕاگەیاندنی سەرۆکی ئەنجوومەنی وەزیران ڕایگەیاند: لە کۆبوونەوەکەدا بەدواداچوون بۆ جێبەجێکردنی کشانەوەی هێزەکانی هاوپەیمانان لە عێراق لەچوارچێوەی ڕاگەیاندنە هاوبەشەکەی ئەیلولی ساڵی 2024 کراوە، کە تێیدا جەخت لەسەر پابەندبوون بە هەموو بڕگەکانی ڕێککەوتنەکە کرایەوە.

 

زانیاریی زیاتر: لە کۆبوونەوەکەدا جەخت لەسەر گرنگی بەردەوامبوونی گفتوگۆکان سەبارەت بە هاوکاریی ئەمنیی هاوبەش لەسەر ئاستی دوولایەنە لە نێوان عێراق و ئەمریکا کرایەوە. 

 

ئه‌وه‌ی پێویسته‌ بیزانیت: سوودانی جەختی کردەوە، کە هاوبەشیی نێوان عێراق و ئەمریکا ئەنجامی گرنگی بەدەستهێناوە و ڕۆڵی لە بەهێزکردنی ئاسایش و سەقامگیری لەسەر ئاستی ناوخۆیی و هەرێمی و نێودەوڵەتی هەبووە.

 

لەلایەکی دیکەوە: ئەدمیراڵ کرووپەر ستایشی ڕۆڵی عێراقی لە بواری بەرەنگاربوونەوەی تیرۆردا کرد و دووپاتی پابەندبوونی وڵاتەکەی لە هاوکاریی ئەمنی و بەهێزکردنی پەیوەندیی ستراتیژی لە قۆناغی داهاتوودا کردەوە.