پەرلەمانتارێک هەوڵی وەرگرتنەوەی متمانە لە سوودانی دەدات

ئاڤا نیوز

ئەندامێکی لیژنەی دارایی لە پەرلەمانی عێراق ڕایدەگەیێنێت، بە هاوکاری ژمارەیەک پەرلەمانتاری دیکە، ڕێکارەکانی لێپرسینەوە لە سەرۆکوەزیرانیان تەواو کردووە و داوایان لە سەرۆکی پەرلەمان کردووە کاتێکی فەرمی بۆ ئەم مەبەستە دیاری بکات.

وێنە گەورەکە: ئەگەرچی لە مانگی ئایاری ڕابردوودا، سەرۆکوەزیرانی عێراق وەزارەتی دارایی ڕاسپارد خشتەی بودجەی ساڵی 2025 ئامادە بکەن، وەک ئامادەکارییەک بۆ پەسەندکردنی لەلایەن ئەنجوومەنی وەزیران و ناردنی بۆ پەرلەمان، بەڵام تاوەکو ئێستا خشتەکە ڕەوانە نەکراوە بۆ دەنگدان لەسەری.

بڵاوکراوەی فەرمی: مستەفا گەرعاوی، ئەندامێکی لیژنەی دارایی لە پەرلەمانی عێراق لە هەژماری فەرمی خۆی لە فەیسبوک ئاماژەی بەوەداوە، هۆکاری ئەم هەوڵە بۆ پێشێلکارییەکانی سەرۆکوەزیران دەگەڕێتەوە کە بریتین لە نەناردنی خشتەکانی بودجە و شیکارییە داراییەکان و دواکەوتنی پڕۆژەیاسای خزمەتی شارستانی فیدراڵی.

زانیاریی زیاتر: ئەم هەنگاوە دوای ئەوە دێت کە گەرعاوی سکاڵایەکی یاسایی لە دژی حکومەت لەلای داواکاری گشتی تۆمار کردبوو کە ئەویش دۆسیەکەی ئاراستەی پەرلەمان کرد بۆ ئەوەی ڕۆڵی دەستووری خۆی ببینێت. پەرلەمانتارەکە باسی لەوەشکردووە، دواتر پرسیارێکی زارەکی ئاراستەی وەزیری دارایی کردووە لەناو پەرلەمان.

لەهەمان کاتدا: بەپێی قسەکانی گەرعاوی، ئەو لەگەڵ ژمارەیەک پەرلەمانتاری "بەرەی ناوەڕاست و باشوور" ڕێکارەکانی لێپرسینەوەیان لە سەرۆکوەزیران تەواو کردووە.

ئەوەی پێویستە بیزانیت: بەگوێرەی بەندی ژمارە 32/ یەکەم لە پەیڕەوی ناوخۆی پەرلەمان، پەرلەمانتاران دەسەڵاتی ئەوەیان هەیە بانگهێشتی سەرۆككۆمار و لێپرسینەوەو بانگهێشتكردنی ئەندامانی ئەنجوومەنی وەزیران بە سەرۆكوەزیرانیشەوە، یاخود هەر بەرپرسێكی دیكەی دەسەڵاتی جێبەجێكردن بکەن.