ئاڤا لە زاری قوباد تاڵەبانییەوە وردەکاری "چەند هەوڵێکی تیرۆرکردنی" بافڵ تاڵەبانی ئاشکرا دەکات

ئاڤا نیوز

مەسرور بارزانی و قوباد تاڵەبانی لە کۆبوونەوەی ئەنجوومەنی وەزیران باسی هێرشکردنە سەر لالەزار و دەستگیرکردنی لاهوور شێخ جەنگی، سەرۆکی بەرەی گەلیان کردووە. قوباد تاڵەبانی بۆ یەکەمجار هەندێ زانیاری نەگوتراوی ئاشکرا کردووە.

چیرۆکی سەرەکی: لە کۆبوونەوەی ئەمڕۆی ئەنجوومەنی وەزیرانی کوردستان باسی هێرشکردنە سەر لالەزار کراوە، قوباد تاڵەبانی، جێگری سەرۆکوەزیران و ئەندامی مەکتەبی سیاسی یەکێتی، وردەکاری ڕووداوەکە و چەند هەوڵێکی تیرۆرکردنی بافڵ تاڵەبانی، سەرۆکی حیزبەکەی ئاشکرا کردووە. لە کۆبوونەوەی ئەنجوومەنی وەزیرانیش ئاماژە بەوە کراوە باسی هێرشکردنە سەر لالەزار کراوە.

زانیاریی تایبەت: لە سەرەتای کۆبوونەوەکەدا مەسرور بارزانی داوای لە قوباد تاڵەبانی کردووە ڕوونکردنەوە لەسەر ڕووداوەکانی لالەزار بدات. قوباد تاڵەبانیش پێش دەستپێکردنی قسەکانی، داوای لابردنی کامێرا و کوژاندنەوەی مایکەکانی کردووە، تاوەکو بە وردی و بێ سانسۆر چیرۆکی هێرشەکە بگێڕێتەوە.

لێدوانی فەرمی: قوباد تاڵەبانی وتوویەتی: "هەوڵ هەبووە پشێوی و ئاژاوەی گەورە دروست بکرێت و پیلان هەبووە بۆ تیرۆرکردنی بافڵ تاڵەبانی لە چوار کاتی جیاوازدا. بەوردی باسی یەکێک لە هەوڵەکانی کردووە و گوتوویەتی: کەسانی پیلانگێڕ تەنیا 500 مەتر لە بافڵ تاڵەبانییەوە دوور بوون، بەڕاستی خوادا کاک بافڵ ڕزگار کردووە لەو هەوڵەیان."

بەگوتەی قوباد تاڵەبانی "ئەوەی کراوە {هێرشکردنە سەر لالەزار} پووچەڵکردنەوەی ئەو پیلانە ئاژاوەگێڕییە و چەسپاندنی یاسا بووە، ئێستاش ڕێکاری یاسایی دەگیرێتە بەر بۆ یەکلاکردنەوەی ئەو بابەتە." ئەوەشی خستووەتەڕوو ک نەک تەنیا بافڵ تاڵەبانی، بەڵکو هەوڵی کوشتنی خۆیشی دراوە، بەڵام وردەکاری زیاتری ئاشکرا نەکردووە و گوتوویەتی کاتێکی تر باسی دەکات.

لەلایەکی دیکەوە: مەسرور بارزانی پاشان قسەی کردووە، نیگەرانی قووڵی خۆی بەرامبەر بە ڕووداوەکە دەربڕیوە و گوتوویەتی: بەداخەوە بووە هۆی گیانلەدەستدان و برینداربوونی ژمارەیەک کەس." سەرەخۆشی خۆیشی ئاراستەی کەسوکاری قوربانییان کردووە و هیوای چاکبوونەوەی بۆ برینداران خواستووە. دووپاتیشی کردووەتەوە کە "پێویستە کێشە و ناکۆکییەکان لەڕێگەی یاسا چارەسەر بکرێن نەک بە بەکارهێنانی تووندوتیژی."