له‌ هه‌ولێر شه‌ڕی نێوان گوڵفرۆشێك و شۆفێرێك برینداربوونی یه‌كێكیانی لێكه‌وته‌وه

ئاڤا نیوز

دروستبوونی دەمەقاڵێ و شەڕ لەنێوان گوڵفرۆشێک و شۆفێرێک لە یەکێک لە ترافیک لایتەکانی هەولێر کاردانەوەی لێدەکەوێتەوە و هەردوولا یەکتر تۆمەتبار دەکەن، شۆفێرەکەش سکاڵای تۆمار کردووە.

ببینە و ببیستە: ڤیدیۆیەکی شەڕە قسە و دواتر بەریەککەوتن لەنێوان گەنجێک و گوڵفرۆشێکدا لە تۆڕە کۆمەڵایەتییەکاندا دەنگدانەوەیەکی زۆری هەبووە، کە تێیدا گوڵفرۆشەکە بە بوتڵێکی شووشە سەری هاوڵاتییەکەی شکاندووە و برینداری کردووە.

لێدوانی فەرمی: گوڵفرۆشەکە، کە لە چوارڕیانی فڕۆکەخانی هەولێر گوڵ دەفرۆشێت، لە بە ئاڤای وت: "دەوری کاتژمێر یەکی شەو بوو، ئۆتۆمبێلێک هات و لە ترافیکەکەدا وەستا. ژن و پیاوێک بوون، پیاوەکە سەرخۆش بوو. منیش چوومە لایان و وتم کاکە گوڵێک ناکڕی بۆ ژنەکەت؟ سەیرم کرد تووڕە بوو، پاڵێکی پێوەنام و جنێوێکی بە باوکم دا. ئێ منیش باوکم مردووە، پێم ناخۆش بوو. لەناو ئۆتۆمبێل هاتە خوارەوە و ملی گرتم، ئیتر خۆم لەژێر دەستی دەرهێنا و بوتڵێکی شووشەم بەدەستەوە بوو، کێشام بەسەری، ئیتر مۆبایلی دەرهێنا و وێنەی گرتم و بڵاوی کردەوە."

بۆچوونی لایەنی بەرامبەر: ئەو گەنجەی کە ڤیدیۆکەی بڵاوکردووەتەوە و سکاڵای لە بنکەی پۆلیسی عەنکاوە تۆمار کردووە، بە ئاڤای وت: "لەگەڵ خێزانم بووم، لە ترافیک گوڵفرۆشەکە هات یەخەی گرتین، شەقی لە جامی ئۆتۆمبێلەکە دەدا و دەیگوت گوڵم لێ بکڕن. وتمان کاکە وازمان لێبێنە نامانەوێ. ئیتر دواتر جنێوی دا، منیش بۆی چووم کەلەیەکی لێدام. منیش پاڵێکم پێوەنا، ئەویش بوتڵێکی شووشەی لە لایەک شاردبووەوە، دیار بوو بۆ شەڕ هێنابووی. شەش بوتڵی لە ئۆتۆمبێڵەکەم دا، دواتر دانەیەکی لە سەرمدا و سەری تەقاندم. لە پشتەوە چوار تەقەڵ سەرم دووراوەتەوە. لە بنکەی پۆلیسی عەنکاوە سکاڵام تۆمار کردووە."