داعش لە چیای پەلکانە کۆتایی هات

ئاڤا نیوز

ڕۆژی چوارشەممە 2025-09-03، لەناوبردنی "لیستی ڕەشی" پاشماوەی چەکدارانی داعش لە  ناوچەی چیای پەلکانە، یەکێک لە ئاڵۆزترین ناوچە جوگرافییەکانی عێراقدا ڕاگەیاندرا.

وێنە گەورەکە: ناوچەی چیای پەلکانە کە دەکەوێتە نێوان هەردوو پارێزگای سەڵاحەدین و سلێمانی، یەکێکە لە ئاڵۆزترین ناوچەی جوگرافی عێراق لەڕووی  سروشتەوە، ئەمەش وایکردووە بۆ چەندین ساڵ ببێتە پەناگەی چەکدارانی داعش و سەرکردە ھەڵھاتووەکانی.

لێدوانی فەرمی: زولفەقار حەیدەر، قایمقامی قەزای دووزخورماتوو،  ڕایگەیاند: لە ھەژدە مانگی ڕابردوودا، دەزگای دژەتیرۆر و ھێزی ئاسمانی و شانەی ھەواڵگری، بەپشتیوانی فەرماندەیی ئۆپەراسیۆنەکانی ڕۆژھەڵاتی سەڵاحەدین، 12 بۆ 16 ئۆپەراسیۆنی سەرکەوتوویان دژی پاشماوەی چەکدارانی داعش ئەنجامدا، لەئاکامدا چەندین سەرکردەی داعش کەناویان لە (لیستی ڕەش) تۆمارکرابوو کوژران و لەناوبران.

زانیاریی زیاتر: حەیدەر ئاماژەی بەوەدا، ناوچەی پەلکانە لە چەند ساڵی ڕابردوودا بەھۆی خۆحەشاردان و چالاکی شانە و سەرکردە هەڵاتووەکانی داعشەوە بۆشاییەکی ئەمنی گەورەی لەناوچەکە دروستکردبوو.

ئەمەش بزانە: لە ساڵی 2014 ـەوە تا دوای ڕاگەیاندنی سەرکەوتنی سەربازی بەسەر ڕێکخراوی داعش لە ساڵی 2017، ناوچەکە وەک ھەڕەشەیەکی ئەمنی بەردەوام مایەوە و ھێرشی جۆراوجۆری لێوە دەکرایە سەر ھێزە ئەمنییەکان و ھاووڵاتیانی مەدەنی.