حکومەت بڕیارێک لە بەرژەوەندیی کرێکاران دەردەکات

ئاڤا نیوز

بەمەبەستی ڕەخساندنی هەلی کاری زیاتر بۆ هاونیشتمانی هەرێمی کوردستان، پێدانی ڤیزا بە  کەسانی سەڵتی هەڵگری ڕەگەزنامەی سووری ڕادەگیرێت.

لێدوانی فەرمی: شێخ کامیل محەممەد، بەڕێوەبەری نشینگەی هەولێر بە ئاڤا نیوزی گوت: " وەزارەتی ناوخۆ پێدانی ڤیزای بە کەسانی سەڵتی هەڵگری وڵاتینامەی سووری ڕاگرتووە، بەڕێوەبەرایەتیی نشینگەش پابەندە بەوەی چیتر مافی مانەوە نەدات بەو کەسە سەڵتانەی سوورین و بۆ کرێکاری دێنە کوردستان".

بۆچی گرنگه‌: لە کابینەی نۆیەمی حكومه‌تی هه‌رێمی كوردستان 138 هەزار و 92 کرێکار دەستەبەرکراون، لە چوارچێوەی ماف و بەرژەوەندیی کرێکاران، سه‌رۆكوه‌زیران بڕیاری داوه‌ دەبێت له‌ 75%ی كرێكاره‌كان نێوخۆیی بن و  دەستەبەری کۆمەڵایەتیی کرێکاران بەشێوەیەکی باشتر چالاک بكرێت.

ئەوەی پێویستە بیزانیت: بڕیارەکە هەموو تەمەنێک دەگرێتەوە، ئەوانەی مافی مانەوەیان نەماوە بۆیان نوێ ناکرێتەوە، جگە لەوانەی ئەو کۆمپانیایەی داوای مانەوەی ئەو کرێکارە دەکات پێویستە بەڵگە و پاساو بداتە وەزارەتی ناوخۆ.

 

باکگراوند: لەدوای سەرهەڵدانی شەڕی نێوخۆیی سووریا و دواتر هێرشی داعش و گرووپە چەکدارەکان، سەدان هەزار هاووڵاتی سووری و ڕۆژئاوای کوردستان ئاوارەی هەرێمی کوردستان بوون، بەپێی نوێترین ئاماریش هێشتا 248 هەزاریان لە هەرێمی کوردستانن، ئەمە لەکاتێکدایە بەردەوام خەڵک لە سووریاوە بۆ کارکردن دێنە هەرێمی کوردستان.