فیلمی "رسالە" یەکەم فیلمی تایبەتە بە هاتنی ئایینی ئیسلام

ئاڤا نیوز

فیلمی "رسالە" یەکەم فیلمی سینەمایی تایبەتە بە هاتنی ئایینی ئیسلام و ژیانی پێغەمبەر محەممەد دروودی خوای لەسەر بێت، باس لە سەرەتاکانی دەرکەوتنی ئایینی ئیسلام و ئاڵنگاریی و ڕێگرییەکانی بەردەم بڵاوکردنەوەی پەیامەکە لە لایەن پێغەمبەر محەممەدەوە دەکات.

چیرۆکی سەرەکی: بەرهەمهێنانی ئەم فیلمە لەسەرەتاوە ناڕەزایی و دژایەتی زۆری لە سەر دروستبوو، بەڵام لە هەوڵێکی بێ ووچاندا ئەم فیلمە لە ساڵی  1976 لە لایەن دەرهێنەری سوری– ئەمریكی (موستەفا عەقاد) کاری دەرهێنانی بۆ کرا و بەرهەمهاتووە، ماوەی فیلمەكە (198) خولەكە، لە وڵاتی (لیبیا) کاری وێنەگرتنی بۆ کراوە.

ئەوەی پێویستە بیزانیت: هەردوو وەشانەکەی لەیەککاتدا و لەیەک لۆکەیشن، وێنەی گیراوه و بۆ دەیان زمانی جیهانی وەرگێڕانی بۆ ئەنجامدارەوە. لە وەشانی ئینگلیزییەکەی ئەکتەری بەناوبانگ، ئەنتۆنی کوین  ڕۆڵی حەمزەی مامی پێغەمبەر دەبینێت.

زانیاریی زیاتر: فیلمی (رسالە) بۆ باشترین موزیک بۆ وەرگرتنی خەڵاتی ئۆسکار پاڵێوراوبوو.

کاریگەریی و لێکەوتەکان: فیلمی (رسالە) زۆرجار ڕووبەڕووی ڕەخنە بووەتەوە، لەبەرئەوەی ئەم فیلمە ئەوەندەی (جەنگ و شەڕ و کوشتار) پیشان دەدا، ئەوەندە باسی هەنگاوە مەدەنی و شارستانییەکانی پێغەمبەر ناكات بۆگەیاندنی پەیامەكەی. لە خوارەوە گرنگترین ئەو هەنگاوانە باسکراوە:

یەكەم: ئاشتەوایی

نامەكانی پێغەمبەر د.خ بۆ پاشای وڵاتان لە ناوچەکەدا، پێش هەرهەنگاوێكی تر

لەو نامانەدا داوایان لێ دەكات كە بە ئاشتییانە، ڕێگەی یەکتاپەرستی هەڵبژێرن.

دووەم: ڕەتکردنەوەی کۆیلایەتی

پیشاندانی (بیلال)ی حەبەشی كە بەر لە هاتنی ئاینی ئیسلام کۆیلە بووە، وەك هێمایەك بۆ یەكسانی مرۆڤەكان لەئیسلامدا و سەرەتایەك بۆ دژایەتیكردنی كولتووری كۆیلایەتی كە لە كۆمەڵگەی عەرەبیدا هەبووە.

سێیەم: قوربانیدان

پیشاندانی قوربانیدانی یارانی پێغەمبەر لە پێناو پەیامی ئیسلامدا.

چوارەم: پیشاندانی ڕۆڵی ئافرەت

لەبانگەوازی ئیسلامیدا كە هەر لە سەرەتاوە و لەگەڵ دابەزینی سرووش (وەحی) ڕۆڵی ئافرەت كەمتر نەبوو لە ڕۆڵی پیاوان، بە نموونە ڕۆڵی (خاتوو خەدیجە)ی خێزانی پێغەمبەر د.خ دیار و ڕوونە لە فیلمەكەدا. هەروەها ڕۆڵی (ئەسما) ی كچی ئەبوبەكر، بە تایبەت لەكاتی كۆچی پێغەمبەر و ئەبوبەكردا بۆ شاری مەدینە.

لەهەمان كاتدا ئازاردان و شەهیدكردنی (خاتوو سومەییە) لەگەڵ یاسری هاوسەریدا لەلایەن سەرانی قورەیشەوە، كە یەكەم ژنی شەهیدە لەئیسلامدا.

پێنجەم: پیشاندانی ئازایەتی و ڕۆڵی بەرچاوی گەنجان لە سەرخستنی ئاینی پیرۆزی ئیسلام.

شەشەم: كۆچی یەكەمی موسڵمانان بۆ وڵاتی (حەبەشە) و ڕۆڵی دیار و سەركەوتووی سەرۆكی وەفدەكە لەگەیاندنی پوختەی پەیامی ئیسلام بە (نەجاشی شای حەبەشە) و هەروەها ڕوونكردنەوەی هەڵوێستی ئیسلام دەربارەی ئاینی مەسیح..

حەوتەم: دانانی بەڵگەنامەی مەدینە وەك دەستورێك بۆ ڕێكخستنی پەیوەندی نێوان پێكهاتەكانی مەدینە و چەسپاندنی پرنسیپی پێكەوەژیان و دیاریكردنی ئەرك و مافەكان.