گوتەبێژی بارەگای بارزانی: هەنگاوەكانی سەرۆك بارزانی خەباتی پێشمەرگەی گەیاندە هەموو جیهان

ئاڤا نیوز

گوتەبێژی بارەگای بارزانی پەیامێكی سەبارەت بە ناونانی شەقامی پێشمەرگە لە پاریسی پایتەختی فەڕەنسا بڵاوكردەوە و دەڵێت، لە دڵی پاریسەوە، ئەو شوێنەی بریسکەی شۆڕشی فەرەنسی بۆ ڕووناککردنەوەی ڕێگای ئازادی گەلان،  لێوەی دەستی پێکرد، ئەمڕۆ ڕێگای شۆڕش و ڕێگای پێشمەرگە یەکدەگرنەوە، دوو ڕێگا کە هەردووکیان لەسەر بەهایەکی هاوبەش کۆدەبنەوە، ئەویش ئازادی، کەرامەت و مرۆڤایەتییە.

چیرۆکی سەرەکی: لەسەر داوای حکومەتی فەرەنسا، ئەمڕۆ هەینی سەرۆک بارزانی سەردانی ئەو وڵاتەی کرد بە مەبەستی کردنەوەی شەقامێک بەناوی پێشمەرگە لەنێو پارکی 'ئۆندرێ سیترۆین' لە پاریسی پایتەخت.

بڵاوکراوەی فەرمی: خالیدە خالید، وتەبێژی بارەگای بارزانی، لە پەیامێکدا لە تۆڕی کۆمەڵایەتی ئێکس ڕایگەیاند، ئەمڕۆ ڕێگای پێشمەرگە لەسەر دەستی پێشمەرگە و مەرجەعی نەتەوەیی کورد، مەسعود بارزانی، دەکرێتەوە، ئەو سەرکردەیەی کە بە هەنگاوە جێگیرەکانی ڕێچکەی قوربانیدانی نەخشاند و خەباتی پێشمەرگەی گەیاندە هەموو جیهان، تاوەکو ببێتە پردێک لەنێوان مێژووی شۆڕشی فەرەنسی و ئێستای پێشمەرگە لەپێناو ئازادیدا و ببێتە شایەتحاڵێکی زیندوو لەسەر بەها هاوبەشەکانی نێوان شۆڕشی فەرەنسی کە جیهانی ڕووناککردەوە و گەلی کورد کە قوربانیدانی کردە ڕێگایەک بۆ پاراستنی کەرامەت و بەدیهێنانی سەربەرزی و پەیامێکی سەرمەدی بۆ هەموو ئەوانەی بەدوای ئازادیدا دەگەڕێن، ناردووە.

زانیاریی زیاتر: فەرەنسا، ئەو وڵاتەی جیهانی فێری ئازادی وەک مافێکی ڕەوا کرد، ئەمڕۆ ڕایدەگەیەنێت کە پێشمەرگە تەنیا هێزێکی سەربازی نییە، بەڵکوو سیمبولی زیندووی مرۆڤەیاتییە بۆ پاراستنی کەرامەت و بەدیهێنانی مافەکانی مرۆڤ.

ئازادی مافێکی تایبەتی گەلێک بەسەر گەلانی دیکەوە نییە، بەڵکوو چارەنووسێکی هاوبەشە بۆ هەموو مرۆڤایەتی و بەرگریکردن لێی ئەرکێکە سنوور و جوگرافیا تێدەپەڕێنێت، بۆ ئەوەی وەک پەیامێکی هەرمان بۆ هەموو نەوەکان بمێنێتەوە، کە ئازادی مافی هەموو مرۆڤێکە و هیچیش لەسەرووی کەرامەتەوە نییە.