مەسرور بارزانی پێشوازی لە شاندێكی باڵای ئیمارات دەكات

ئاڤا نیوز

ئیمارات لەڕێگەی هەردوو وەزیری دەوڵەت و وەزیری ڕۆشنبیری، خواستی خۆی بۆ پەرەپێدانی پەیوەندییە قووڵ و مێژووییەكانی لەگەڵ هەرێمی كوردستان دەردەبڕێت، لە بوارەكانی سیاسی، ئابووری، کولتووری و مرۆیی.

چیرۆكی سەرەكی: سەرۆکوەزیران مەسرور بارزانی، پێشوازی كرد لە شاندێكی باڵای ئیمارات كە پێكهاتبوون لە هەریەك لە نوورە بنت محەممەد ئەلكەعبی، وەزیری دەوڵەت و شێخ سالم بن خالید ئەلقاسمی، وەزیری ڕۆشنبیریی ئەو وڵاتە.

باسی چی كرا: لەمیانی دیدارەكەدا، هەردوولا هاوڕابوون لە فراوانكردنی هاریكاری بۆ خزمەتكردنی زیاتری بەرژەوەندییە هاوبەشەكانی نێوان هەرێمی كوردستان و ئیمارات، لەپێناو گەیشتن بە خواستەكان بۆ گەشەپێدان و خۆشگوزەرانیی زیاتر.

بڵاوكراوەی فەرمی: ئاژانسی هەواڵی ئیمارات 'وام' بڵاویكردووەتەوە، وەزیری دەوڵەت، سڵاوی هەریەك لە شێخ محەممەد بن زاید ئال نهیان، سەرۆكی ئیمارات و شێخ محەممەد بن ڕەشید ئال مەکتووم، جێگری سەرۆک و سەرۆکوەزیرانی ئیمارات و حاکمی دوبەی و شێخ مەنسوور بن زاید، سەرۆککۆماری ئیماراتی بە سەرۆكوەزیران مەسرور بارزانی گەیاند و هیوای خواست پەیوەندییە قووڵ و مێژووییەكانی نێوان ئیمارات و هەرێمی كوردستان لە بوارەكانی سیاسی، ئابووری، كولتوری و هاریكاریی مرۆیی، زیاتر بەرەوپێش بچێت.

ئەوەی پێویستە بیزانیت: شاندێكی باڵای ئیمارات، بەمەبەستی بەشداریكردن لە مەراسیمی بەفەرمیی كردنەوەی شوێنەوارە مێژووییەكانی شاری مووسڵ، ئێستا لە هەرێمی كوردستانن، كە ئەو شوێنەوارانەی شارەكە دوای خاپووركردنی لەلایەن ڕێكخراوی تیرۆرستی داعشەوە، بە پارەداركردنی ئیمارات و بەهاوبەشی و سەرپەرشتیی یونسكۆ بە دروشمی "زیندووکردنەوەی ڕۆحی موسڵ" نۆژەن كرانەوە.