ترەمپ: دانوستانی قووڵ لەگەڵ حەماس ئەنجام دەدەین

ئاڤا نیوز

سەرۆکی ئەمریکا ڕایگەیاند، واشنتن دانوستانی زۆر قووڵ لەگەڵ بزووتنەوەی حەماس ئەنجام دەدات بەمەبەستی ئازادکردنی سەرجەم بارمتە ئیسرائیلییەکان.

وێنە گەورەکە: بەهۆی هێرشە بەردەوامەکانی ئیسرائیل تا دێت دۆخی کەرتە غەززە خراپتر دەبێت، ئەمەش لە کاتێکدایە کە ئەمریکا و بەردەوامە لە هەوڵەکانی بۆ ئەنجامدانی ڕێککەوتنێک لە نێوان ئیسرائیل و بزووتنەوەی حەماس، بەڵام تاوەکو ئێستا هەوڵەکان هیچ ئەنجامێکیان نەبووە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: ''ئێمە دانوستانێکی چر و قووڵ و لەگەڵ حەماس دەکەین بۆ ئازادکردنی بارمتەکانی ئیسرائیل و گومان دەکەین بارمتەی زیاتر لە کەرتی ‌غەززە کوژرابن و هیوادارم کە ئەمە ڕاست نەبێت''.

هاوکات گوتی، بە حەماس ڕاگەیێنراوە کە هەموو بارمتەکان ئازاد بکات، ئەگەر ئازادیان نەکات ئەوا دۆخەکە زیاتر سەخت دەبێت.

ئەمەش بزانە: سوپای ئیسرائیل دەڵێت، لە کۆی 47 بارمتە کە لە غەززە تەنیا  25 کەسیان ماونەتەوە و  ئیسرائیلیش بەدوای وەرگرتنەوەی تەرمەکانیاندایە.