پەرلەمانتارێکی عێراق: ئەم هەفتەیەش كۆبوونەوەكانی هەولێر و بەغدا بەردەوام دەبن

ئاڤا نیوز

دوای ئەوەی كۆتایی هەفتەی ڕابردوو نەگەیشتنە ڕێككەوتن سەبارەت بە ناردنی بڕی پارەی داهاتی نانەوتی و دەستپێكردنەوەی هەناردەكردنی نەوتی هەرێمی كوردستان، وا بڕیارە ئەم هەفتەیەش كۆبوونەوەكانی شاندی دانوستاندكاری هەولێر و بەغدا بەردەوام بن.

چیرۆکی سەرەکی: بەهۆی ڕێكنەكەوتنی هەولێر و بەغدا، تاوەكوو ئێستا چارەنووسی مووچەی مانگەكانی حەوت و هەشت و دواتر نادیارە، بەپێی زانیارییەكان ئەگەر ئەم هەفتەیە هەردوولا لەسەر پرسی داهاتی نانەتی و هەناردەكردنی نەوت بگەنە ڕێككەوتن چارەنووسی مووچەی فەرمانبەرانی هەرێمی كوردستان یەكلا دەبێتەوە.

لێدوانی فەرمی: شوان كەلاری، پەرلەمانتاری عێراق لە فراكسیۆنی پارتی دیموكراتی كوردستان بە ئاڤا میدیای ڕاگەیاند: هەرچەندە پێنجشەممە شاندی دانوستاندنكاری هەولێر و بەغدا، لە شاری بەغدا كۆبوونەوە و نەگەیشتنە ڕێككەوتن، بەڵام كۆبوونەوەكان كۆتاییان نەهاتووە و ئەم هەفتەیەش چەند كۆبوونەوەیەكی دیكە لەنێوان شاندی باڵای هەردوو حكومەتی هەرێمی كوردستان و حكومەتی فیدڕاڵ بەڕێوەدەچێت.

ئەو پەرلەمانتارە گوتیشی: ڕاستە لە كۆتا كۆبوونەوەیان شاندی هەولێر و بەغدا نەگەیشتوونەتە ڕێككەوتن بەڵام بۆچوونی هەردوولا سەبارەت بە یاسای كارگێڕیی دارایی خراوەتە ڕوو و زۆر دوور نین لەیەكتر و لەسەر زۆر خاڵیش لەیەك نزیكن و هاوبۆچوونن، وا بڕیارە سبەی و دووسبەی كۆبوونەوەكانی نێوان دەستپێبكەنەوە بۆ ئەوەی بگەن بە چارەسەری كۆتایی.

 

زانیاریی زیاتر: ئەو پەرلەمانتارە ئاماژەی بە ئەوەش دا كە تەوەری گفتوگۆكان زیاتر داهاتی نانەوتییە  بەڵام داواكاریی كۆمپانیاكانی نەوتیش بەشێكە لە گفتوگۆكان و كۆمپانیاكان داوای گەرەنتی دەكەن كە ئەمەش تاوەكوو ئێستا بەربەستە لەبەردەم دەستپێكردنەوەی هەناردەكردنی نەوتی هەرێمی كوردستان.

لەلایەکی دیکەوە: شوان كەلاری ڕوونیشی كردەوە كە دەبێت بۆ سێشەممە كە وا بڕیارە كۆبوونەوەی ئەنجوومەنی وەزیرانی عێراق بەڕێوە بچێت، شاندی دانوستاندنكار ڕاپۆرتیان ئامادە بێت و بخرێتە بەردەم سەرۆكوەزیرانی عێراق بۆ ئەوەی لە كۆبوونەوەكەدا گفتوگۆی لەسەر بكرێـت و بخرێتە دەنگدانەوە و بڕیاری كۆتایی لێبدرێت.