خەرجی گۆڕینی ناوی وەزارەتی بەرگریی ئەمریکا ملیاران دۆلارە؛ مۆر و کلێنس و جلوبەرگی بەرپرسانیش دەگرێتەوە

ئاڤا نیوز

 

ڕۆژنامەی پۆلیتیکۆی ئەمریکی بڵاوی کردەوە، گۆڕینی ناوی وەزارەتی بەرگریی ئەمریکا بۆ وەزارەتی جەنگ پێویستی بە خەرجکردنی ملیارەها دۆلار دەبێت بۆ گۆڕینی (مۆر)ـی وەزارەتەکە لە سەرجەم ویلایەتەکان و دامەزراوە جیهانییەکان.

 

وێنەگەورەکە: ڕۆژی هەینی 5-9-2025، سەرۆکی ئەمریکا بڕیاری دا ناوی وەزارەتی بەرگریی وڵاتەکەی بکاتە [وەزارەتی جەنگ] وەک بەشێک لە هەوڵەکانی ئیدارەی ترەمپ بۆ ئامادەکردنی سوپایەکی بەهێز و سەرکەوتووتر لە جیهاندا.

 

زانیاریی بەدەستهاتوو: ڕۆژنامەی پۆلیتیکۆی ئەمریکی چەند وردەکارییەکی لەبارەی گۆرینی ناوی وەزارەتەکە بڵاوکردەوە، تێیدا هاتووە ئەم گۆڕینە پێویستی بە خەرجکردنی ملیاران دۆلارە، چونکە دەبێت مۆری وەزارەتەکە لە 50 ویلایەتەکەی ئەمریکا و 40 وڵات و 700 هەزار دامەزراوە لە سەرانسەری جیهاندا بگۆردرێت. 

 

قووڵتر: گۆڕینی ناوی وەزارەتەکە وایکردووە بەرپرسانی پێنتاگۆن لە ئەرکێکی قورسدا بن بۆ جێبەجێکردنی ئەو فەرمانە، چونکە گۆڕینەکە هەموو شتێک دەگرێتەوە، وەکو لقە سەربازییەکانی پێنتاگۆن  و دەیان دەزگای دیکەی سەر بەو وەزارەتە تەنانەت، کلێنسە نەخشدارەکانی هۆڵی نانخواردنی وەزارەتەکە و چاکەتی بەرپرسان و کلیل و سەرجەم کەرەسەتەکانی وەزارەتەکە.

 

زانیاریی زیاتر: بۆ گۆڕینی ناوی وەزارەتەکە پێویستی بە ڕەزامەندیی کۆنگرێس هەیە، بەڵام ڕۆژنامەکە لە زاری بەرپرسێکی ئاگاداری ئەمریکییەوە ڕایگەیاندووە کە ''ترەمپ بەدوای دەرچەیەکی یاساییدا دەگەڕێت تاوەکوو بتوانێت ناوی وەزارەتەکە بگۆڕێت بێئەوەی پێویستی بە ڕەزامەندیی کۆنگرێسی وڵاتەکەی هەبێت."

 

ئەمەش بزانە: وەزارەتی بەرگریی ئەمریکا، گەورەترین دامەزراوەی حکومی ئەمریکایە بە هەبوونی زیاتر لە سێ ملیۆن کارمەندی مەدەنی و سەربازی.