عێراق و ئەمریکا جەخت لە کەم کردنەوەی گرژییەکانی ناوچەکە دەکەنەوە

ئاڤا نیوز

سەرۆکوەزیرانی عێراق و هەڵسوڕێنەری نوێی باڵیۆزخانەی ئەمریکا لە عێراق تاوتوێی ڕێگاکانی هاوکاریی نێوانیان کرد بۆ پشتگیریکردنی سەقامگیریی ناوچەکە، کەم کردنەوەی گرژییەکان، ڕاگرتنی بەردەوامبوونی ململانێکان و ڕێگری کردن لە فراوانبوونی ناکۆکییەکان.

 

چیرۆکی سەرەکی: 6ی ئەیلوولی 2025، محەممەد شیاع سوودانی، سەرۆکوەزیرانی عێراق، پێشوازی لە جۆشوا هاریس، هەڵسوڕێنەری نوێی باڵیۆزخانەی ئەمریکا لە عێراق کرد، بەبۆنەی دەستبەکاربوونی لە پۆستەکەیدا.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیران، لە میانی دیدارەکەدا، سوودانی گرنگیی پەیوەندیی دووقۆڵی ستراتیژیی نێوان عێراق و ویلایەتە یەکگرتووەکانی ئەمریکای دووپاتکردەوە، هاوکات ئاماژەی بە پێویستیی زیادکردنی هەماهەنگی هاوبەش و پەرەپێدانی پەیوەندییەکان لە بوارە جیاوازەکاندا کرد، بە شێوەیەک کە خزمەت بە بەرژەوەندیی هەردوو گەلی دۆست بکات.

 

- دیدارەکە هەروەها تیشکی خستە سەر بارودۆخی ناوچەکە، گرنگترین دۆسییە نێودەوڵەتییەکان و ئەو پرسانەی کە جێگەی بایەخی هاوبەشن، لەگەڵ ئاڵوگۆڕکردنی بۆچوونەکان لەبارەیانەوە.