سەنتەری میترۆ:  شەوی ڕووداوەکەی لالەزار هێزێکی ئەمنی قاسەی پارە و ئامێری ڕیش تاشینی کارمەندانی ڕێکخراوەکانیان بردووە

ئاڤا نیوز

سەنتەری میترۆ ڕایدەگەیەنێت، لە شەوی ڕووداوەکەی سەر لالەزار، هێزە ئەمنییەکانی سلێمانی هێرشیان کردووەتە سەر ئۆفیسی پایا کە نوسینگەی ژمارەیەک ڕێکخراوی ناوخۆیی و بیانیی تێدایە لە سلێمانی و بەشێکی زۆری کەرەستەکانی نوسینگەکانیان بردووە، لە قاسەی پارە تا فڵچەی ددان و ئامێری ڕیش تاشتنیان بردووە.

وێنە گەورەکە: شەوی 22-8-2025 هێزێکی زۆری کۆماندۆ و دژە تیرۆری یەکێتی هێرشیان کردە سەر شوێنی مانەوەی لاهوور شێخ جەنگی لە تەنیشت هۆتێل لالەزار، دوای شەڕێکی خوێناوی شوێنەکە کۆنتڕۆڵکرا. 

ڕاگەیێنراو فەرمی: ئەمڕۆ یەکشەممە، سەنتەری میترۆ لە ڕاپۆرتێکدا وردەکاری بردن و تاڵانکردنی ئۆفیسی پایا دەخاتە ڕوو، لە ڕاگەیێنراوەکەی سەرنتەری میترۆ هاتووە، "ئۆفیسی پایا، دەكەوێتە گەرەكی سەرچناری شاری سلێمانی، نزیكە لە ماڵی سەرۆكی بەرەی گەل لاهور شێخ جەنگی و هۆتێل لالەزار، چەند رێكخراوێكی كەلتوری و ژینگەیی و ڕێكخراوێكی نێودەوڵەتی لەو تەلارە ئۆفیسییان هەیە، وەك رێكخراوی بەهرەدار بۆ پەرەپێدانی گەنجان، پایا ئەیجنسی، ئارت پڵەس، پارێزەرانی ئاوی عێراق و كوردستان، ڕێكخراوی UPP ".

بە گوێرەی ڕاگەیێنراوەکەی سەنتەری میترۆ شەوی ڕووداوەکە هێزە ئەمنییەکان لە ئۆفیسی پایا ئەم کەرەستانەیان بردووە، (قاسەی پارە بەوەی لەناویدا بووە كە پارەی پرۆژەكان بووە، چوار پرینتەری ڕەنگاوڕەنگ و ڕەش و سپی، تەلەفونی سەتەلایتی سورەیا، چەند سێتیێكی كۆمپیوتەر، نۆ لاپتۆپی جۆراو جۆر، سێتی داتاشۆ، سێ‌ سێتی كامێرای سۆنی و كانون، ئامێری مای فای ئاسیا سێل و فاست لینك و ئای كیو، ئامێری ژماردنی پارە، چەند شاشەیەكی تیڤی، پاسپۆرتی كارمەند، چەند هیدفۆنێك، سپیكەر، مۆبایل، و چەندین یوپی ئێس، تا دەگاتە كەرەستەی زۆر زۆر سادەییش وەك: فلچەی ددان شتن و ئامێری ریشتاشیینی كارمەندان).

ئەوەی پێویستە بیزانیت: بەشێکی زۆری ئەو ڕێکخراوانە بیانین، بۆ نموونە ڕێكخراوی UPPڕێکخراوێکی قازانج نەویستی ئیتاڵییە. کار دەکات بۆ دروستكردنی پردی ئاشتی و بەهێزكردنی ڕێكخراوەكانی كۆمەڵگەی مەدەنی لە ناوچە جێناكۆكەكانی وەك عێراق و ڕۆژهەڵاتی ناوەڕاست و باكووری ئەفریقا، لە ڕێگەی پڕۆژەی گەشەپێدانی كۆمەڵگا، گەنجان، بەهێزكردنی ژنان، و پاڵپشتیكردنی پەنابەران.

زانیاریی زیاتر: لە ڕاگەیێنراوەکەی سەنتەری میترۆ ئەوەش هاتووە، ئەو ڕێكخراوانە هیچ پەیوەندییەكیان بە ململانێی سیاسی و چەكدارییەکانی ئەم دواییە نییە، تا بكرێتە پاساو بەو شێوەیە دەستبگرن بەسەر كەلوپەلی ئەو ڕێكخراوانە. سەنتەری میترۆ داوا دەكات داوای لێبوردنیان لێبكرێت و قەرەبووی زیانەكانیان بۆ بكرێتەوە.