شاندی دانوستانکاری هاوبەشی کورد سەردانی دیمەشق دەکات

ئاڤا نیوز

ئەو شاندە هاوبەشە کوردییەی کە لە ساڵی ڕابردوو بڕیاری پێکهێنانی درا، لەماوەیەکی نزیکی داهاتوو سەردانی دیمەشق دەکات و لەگەڵ حکومەتی سووریا تاوتوێی مافە دەستوورییەکانی کورد دەکات.

چیرۆکی سەرەکی: بڕیارە بەمزووانە و بۆ یەکەمجار شاندی دانوستانکاری هاوبەشی کورد لە ڕۆژئاوای کوردستان سەردانی دیمەشق بکات و لەگەڵ دەسەڵاتدارانی نوێی سووریا لەبارەی گەرەنتی بە دەستووریکردنی مافەکانی کورد کۆببێتەوە.

زانیاریی بەدەستهاتوو: سەرچاوەیەکی سیاسی ئاگادار ئەمڕۆ دووشەممە بە میدیای ڕۆژئاوای کوردستانی ڕاگەیاند، شاندی هاوبەشی کورد بۆ دانوستان لەگەڵ دیمەشق کە لە کۆنفڕانسی یەکڕیزی کورد لە قامیشلۆ لە 26ـی نیسان ساڵی ڕابردوو بڕیاری پێکهێنانی دراوە، لە ماوەیەکی "زۆر نزیکی داهاتوو" سەردانی دیمەشق دەکات.

زانیاریی زیاتر: لەم سەردانەدا شاندی هاوبەشی کورد و دەسەڵاتدارانی نوێی سووریا گفتوگۆ لەسەر پاراستنی مافەکانی کورد و گەرەنتیکردنی لە دەستووریی داهاتووی سووریا دەکەن، هەروەها پرسی دیموکراسی و ئازادییەکانیش لە سووریادا تاوتوێ دەکرێن.

پێشتریش ئەندامانی شاندی هاوبەشی کورد کە نۆ کەسن، ئاماژەیان بەوەکردبوو، بە هەموو توانایانەوە کار بۆ ئەوە دەکەن خواستەکانی کورد و مافەکانی لە سووریایەکی دیموکراسیی و لامەرکەزیدا مسۆگەر بکەن.

باکگراوند: لە کۆنگرەی یەکڕیزی کورد کە لە 26ـی نيسانی 2025 لە قامیشلۆ بەڕێوەچوو بڕیاردرا لیژنەیەک لە لایەنە کوردییەکان پێکبهێنرێت بۆ دانوستان لەگەڵ دیمەشق.