قاسم ئەعرەجی: بەغدا پارەی بۆ دروستکردنی کەمپی هێزەکانی ئۆپۆزسیۆنی ئێران لە کوردستان خەرجکردووە

ئاڤا نیوز

ڕاوێژکاری ئاسایشیی نیشتیمانی عێراق دەڵێت، بە پشتیوانی حکومەتی کوردستان لێکتێگەیشتنی ئەمنیی نێوان عێراق و ئێران جێبەجێکراوە و هێزەکانی ئۆپۆزسیۆنی ئێران لە هەشت کەمپ لە هەولێر و سلێمانی جێگیرکراون، بەغداش بودجەی بۆ دروستکردنی ئەو کەمپە و پێداویستییەکانیان خەرجکردووە.

وێنە گەورەکە: مانگی ئازاری ساڵی 2023 عێراق و ئێران لێکتێگەیشتنی ئەمنییان واژۆکرد، بەگوێرەی ڕێککەوتنەکەش پێشمەرگەی حیزبەکانی ڕۆژهەڵاتی کوردستان لەسەر سنووری ئێران دووردەخرێنەوە، لە بەرامبەریشدا تاران چیتر ناوچە جیاوازەکانی کوردستان تۆپباران ناکات.

لێدوانی فەرمی: قاسم ئەعرەجی، ڕاوێژکاری ئاسایشیی نیشتیمانی عێراق لە چاوپێکەوتنێکی کەناڵی شەرقییە نیوزدا ئاماژەی بەوەشکرد، "لێکتێگەیشتنی ئەمنیی نێوان عێراق و ئێران بەپشتیوانی تەواوەتی هەرێمی کوردستان و بەڕێز مەسعود بارزانی و سەرکردەکانی دیکەی هەرێم و بەڕێز بافێڵ هاتووەتەئاراوە، دوای ئەم لێکتێگەیشتنە سەرجەم هێزە ئۆپۆزسیۆنەکانی ئێران بۆ کەمپەکان گوازراونەتەوە، بەغداش پارەی بۆ کەمپەکان خەرجکردووە و ئێستا چوار کەمپ لە هەولێر و چوار کەمپیش لە سلێمانی بۆیان دروستکراوە".

وتیشی، "کەمپەکان بۆ ئەندامانی ئەو هێزانەن کە ئێستا لە کوردستانن و پێشتر 77 خاڵی سەربازییان لەسەر سنووری عێراق  وئێران هەبووە و لەکردەی سەربازیدا لەناو ئێران بەکاریاندەهێنان، خاڵە سەربازییەکانیش لەو شوێنانە بوون کە هێزەکانی پاسەوانی سنوور و پێشمەرگەی لێنەبووە، ئێستاش هێزەکانی پاسەوانی سنوور لەو ناوچانە بڵاوەیانپێکراوە و خاڵە سەربازییەکان هەڵگیراون".

ڕاوێژکاری ئاسایشیی نیشتیمانی عێراق دەشڵێت، ژمارەی ئەندامانی هێزە ئۆپۆزسیۆنەکانی ئێران لە هەرێمی کوردستان لە پێنج هەزار کەس کەمترە و حکومەتی کوردستان سەرپەرشتی کەمپەکان دەکات، ئامانجی سەرەکی هەولێر و بەغداش ئەوەیە ئەو هێزانە هیچ کردەیەکی سەربازیی دژ بە کۆماری ئیسلامی ئێران نەکەن.