پڕۆژەی ڕووناکی گەیشتە قەزای خەلیفان و زیاتر لە نۆ هەزار هاوبەش سوودمەند دەبن

ئاڤا نیوز

پڕۆژەی ڕووناکی گەیشتە سێیەم قەزا لەئیدارەی سەربەخۆی سۆران، بڕیارە پێش کۆتایی ئەم مانگە لە سنووری هەر شەش قەزاکە جێبەجێ بکرێت و کارەبای سنوورەکە بکرێت بە 24 کاتژمێری.

وێنە گەورەکە: پڕۆژەی ڕووناکی، پڕۆژەیەکی ستراتیژیی حکومەتی هەرێمی کوردستانە کە لە کابینەی نۆیەم بڕیاری لەسەر درا و کەوتە بواری جێبەجێکردنەوە، بەگوێرەی ئەو پلانەی دانراوە تا کۆتایی ساڵی 2026 کارەبای سەرجەم ماڵ و شوێنە بازرگانییەکان دەبێتە 24 کاتژمێری بە تێچووی کەمتر و لە ژینگەیەکی پاکتر.

لێدوانی فەرمی: ئەردەوان ئیبراهیم، بەرێوەبەری گشتیی کارەبای سۆران بە ئاڤای وت، ئەمڕۆ تیمەکانی پڕۆژەی ڕووناکی دەستیان بەکارکردن لە زۆنەکانی قەزای خەلیفان کردووە، لەماوەی دوو ڕۆژدا قۆناغی یەکەم تەواو دەبێت و نۆ هەزار و 628 هاوبەش لە پڕۆژەکە سوودمەند دەبن.

ئەمەش بزانە: بەگوێرەی ئەو بەرنامەیەی بەڕێوەبەرایەتیی گشتیی کارەبای سۆران دایناوە، هەنگاوی داهاتوو پڕۆژەکە لە سنووری ناحییەی وەرتێ دەستپێدەکات و دواتر ناوچەکانی دەڤەری باڵەکایەتی دەگرێتەوە. بەشێوەیەکی گشتیی لەسنووری ئیدارەی سەربەخۆی سۆران 87 هەزار هاوبەش سوودمەند دەبن.

بۆچی گرنگە: لە ئیدارەی سەربەخۆی سۆران 116 مۆلیدە ڕۆژانە کار دەکەن، بە گەیشتنی تەواوەتی کارەبای پڕۆژەی ڕووناکی ئەو ژمارەیە لە مۆلیدە دەکوژێنەوە، بەمەش ژینگەی ناوچەکە زیاتر پاک دەبێتەوە.