بۆ یەکەمجار ترام دەگاتە شەقامێکی بەغدا

ئاڤا نیوز

 

لە هەنگاوێکی مێژوویی و چاوەڕوانکراودا، یەکەمین (سکەی ترام) لە عێراق دەگاتە شەقامی ڕەشیدی دێرین لە بەغدا، کە ئاماژەیە بۆ دەستپێکردنی قۆناغێکی نوێ لە پەرەپێدانی ژێرخانی گواستنەوە و گەشتیاری لە پایتەختدا. چاوەڕوان دەکرێت لە داهاتوویێکی نزیکدا کارەکانی دانانی سکەی ترام لە ناوەڕاستی ئەم شەقامە قەرەباڵغە دەست پێ بکات.

 

شێوازی جێبەجێکردن: ئەم پڕۆژەیە، لەلایەن دەستپێشخەریی (نبض بغداد)ـەوە جێبەجێ دەکرێت و بە پاڵپشتی کۆمەڵەی بانکە تایبەتەکان و بە بودجەی بانکی ناوەندی، ئامانجی گۆڕینی بەغدای کۆنە بۆ ناوەندێکی بازرگانی و ڕۆشنبیریی زیندوو و سەرنجڕاکێش.

 

ئەوەی پێویستە بیزانیت: ترامەکە، وەک هۆکارێکی گواستنەوەی ژینگەدۆست، نەک تەنیا چارەسەرێک دەبێت بۆ قەرەباڵغی، بەڵکو دەبێتە ڕاکێشانی گەشتیار لە دڵی بەغدای مێژووییدا، کە دانیشتوانی پایتەخت و گەشتیاران لە سەرانسەری جیهانەوە ڕادەکێشێت.

 

ئەمەش بزانە: پڕۆژەی هێڵی ترامی شەقامی ڕەشید، جگە لە بەخشینی سیمایەکی نوێ بە شار، چاوەڕوان دەکرێت کاریگەرییەکی بەرچاوی لەسەر بوژانەوەی ئابووریی ناوخۆیی هەبێت. پێشبینی دەکرێت هەزاران هەلی کار بۆ گەنجان بڕەخسێنێت و نرخی موڵک و خانووبەرە لە ناوچەکەدا بەرز بکاتەوە.

باکگراوند: شەقامی ڕەشید، یەکێکە لە کۆنترین و ناسراوترین شەقامەکانی بەغدا، لە ساڵی 1916 لە سەردەمی عوسمانیدا دروستکراوە. ناوی "ڕەشید" لە خەلیفە هارونە ڕەشیدەوە وەرگیراوە و مێژوویەکی دەوڵەمەندی بازرگانی، ڕۆشنبیری و سیاسی هەیە، کە بووەتە ناوەندێکی گرنگی کۆمەڵایەتی و فەرهەنگی شارەکە.