وەزارەتی پەروەردە وادەی دەستپێکردنی ساڵی نوێی خوێندنی دیاری کرد

ئاڤا نیوز

 

وەزارەتی پەروەردەی هەرێمی کوردستان ڕۆژی یەکشەممە، 21ی ئەیلوولی 2025، وەک دەستپێکی ساڵی خوێندنی نوێ بۆ سەرجەم قوتابخانە حکوومییەکان و ئەو قوتابخانە ناحکوومییانەی سیستمی وەزارەتی پەروەردە پەیڕەو دەکەن، دیاری کرد.

 

چیرۆکی سەرەکی: ڕۆژی یەکشەممە، 7ی ئەیلوولی 2025، ئەنجوومەنی وەزارەتی پەروەردەی هەرێمی کوردستان کۆبوونەوەی ئاسایی مانگانەی خۆی ئەنجام دا. لەم کۆبوونەوەیەدا، چەندین بابەتی گرنگی پەروەردەیی گفتوگۆی لەسەر کرا، لەوانە: دیاریکردنی وادەی دەستیپێکردنەوەی دەوام، تاقیکردنەوەی دەرەکی، ڕیفۆرمی قۆناغی ئامادەیی و هەڵسەنگاندنی دەرەکی.

ئەوەی پێویستە بیزانیت: ڕوونکردنەوەی زیاتر لەبارەی وردەکارییەکانی ساڵنامەی خوێندنەکە، لە داهاتوودا لەلایەن بەڕێوەبەرایەتیی گشتیی تاقیکردنەوەکان و ساڵنامەی خوێندنەوە دەدرێت و ئاڕاستەی بەڕێوەبەرایەتیی گشتیی پەروەردەی پارێزگاکان و ئیدارە سەربەخۆکان دەکرێت.

لەلایەکی دیکە: هەر لە کۆبوونەوەکەدا، ئەنجوومەنی وەزارەت خشتەی بەشەوانەکانی بۆ ساڵی خوێندنی 2025-2026 پەسەند کرد. بڕیارە ئەم خشتەیەش لەلایەن بەڕێوەبەرایەتیی گشتیی پرۆگرام و چاپەمەنییەکان گشتاندنی پێبکرێت و بەسەر ناوەندەکانی خوێندندا دابەش بکرێت.