لە وان 334 مەڕ بەدوای بەرانێک لە شاخ هەڵدێران

ئاڤا نیوز

 

لە ڕووداوێکی سەیر و کارەساتباردا، لە گوندێکی سەر بە شاری وان لە باکووری کوردستان، 334 سەر مەڕ بەدوای بەرانێکدا لە شاخێکەوە خۆیان هەڵداوەتە خوارەوە و مردار بوونەتەوە.

 

چیرۆکی سەرەکی: بەگوێرەی گێڕانەوەکانی شوانەکە، لەکاتی لەوەڕاندنی مەڕەکانی شەوی بەسەرهاتووە و ویستوویەتی مەڕەکانی بباتەوە بۆ گوندەکەی، ئەو دەڵێت، "دنیا تاریک بووە و هیچ نەیدیتووە." لەپڕ، ڕێگەی لێ ون دەبێت و بەرانێکی گەورە کە لە پێشی مێگەلەکەدا ڕۆیشتووە، دەکەوێتە ناو دۆڵێکەوە کە وەک خەرەندێک وایە و لە بەرزاییەکەوە بەربووەتەوە.

 

شوانەکە بەردەوام دەبێت لە گێڕانەوەی ڕووداوەکە و دەڵێت، "هەر ئەوەندەم زانی بەرانەکە کەوتە خوارەوە، مەڕەکانی تریش بەدوایدا یەک بە دوای یەکدا، کە ژمارەیان 334 مەڕ بوو هەموویان خۆیان هەڵدایە خوارەوە و مردار بوونەوە."

 

ئەوەی پێویستە بیزانیت: کاتێک پرسیار لە شوانەکە کراوە کە بۆچی ڕێگەی لە مەڕەکانی دیکە نەگرتووە لەوەی هەڵدێرێن لە دوای یەکەم و دووەم مەڕ، لە وەڵامدا گوتوویەتی: "توانای کۆنترۆڵکردنی دۆخەکەم نەبوو. ڕێگەم لێ دەگرتن وایان دەزانی لێکیان جیا دەکەمەوە و غەدریان لێ دەکەم، هەموویان ڕایان دەکرد و خۆیان هەڵدەدایە خوارەوە."

 

زانیاریی زیاتر: ئەم مەڕانە هی 18 خێزان بوون و زیانێکی گەورەیان پێگەیشتووە. لە ئێستادا، حکوومەت لیژنەیەکی پێکهێناوە بۆ قەرەبووکردنەوەی خاوەن مەڕە زیانلێکەوتووەکان.