ڤەنزوێلا 25 هەزار سەرباز لە سنووری کۆڵۆمبیا جێگیر دەکات

ئاڤا نیوز


سەرۆکی ڤەنزوێلا بڕیاری جێگیرکردنی 25 هەزار سەرباز لە سنووری وڵاتەکەی و کۆڵۆمبیا دەدات، وەک خۆیان دەڵێن بۆ  ''بەمەبەستی پاراستنی ئاسایشی وڵاتە''.

وێنە گەورەکە: تا دێت ناکۆکییەکانی نێوان ئەمریکا و ڤەنزوێلا زیاتر دەبێت ئەمەش  دوای ئەوەی ئەمریکا بڕیاری ناردنی کەشتیی سەربازی بۆ سنووری ئەو وڵاتەی دا، سەرۆکی ڤەنزوێلاش هۆشداریی دەدات لەوەی وڵاتەکەی ئامادەیە بۆ هەر ئەگەرێک و ڕووبەڕووبوونەوەیەک.

لێدوانی فەرمی: نیکۆلاس مادۆرۆ، سەرۆکی ڤەنزوێلا ڕایگەیاند: فەرمانم بە جێگیرکردنی 25 هەزار سەرباز لە هێزە نیشتمانییەکانمان داوە بۆ بەرپەرچدانەوەی هەر ئۆپەراسیۆنێک و پاراستنی سەروەری و ئاسایشی وڵاتەکەمان و خەباتکردن بۆ ئاشتی.

زانیاریی زیاتر: پێشتر مادۆرۆ ڕایگەیاندبوو ڤەنزوێلا ئامادەیە بۆ گواستنەوە لە  "قۆناغی سیاسی" بۆ "قۆناغی خەباتی چەکداری" ئەگەر لەلایەن ئەمریکاوە هێرش بکرێتە سەر.

قووڵتر: دۆناڵد ترەمپ، سەرۆکی ئەمریکا دەڵێت، ڤەنزوێلا ڕێوشوێنی پێویست بۆ بەرەنگاربوونەوەی بازرگانیکردن بە ماددە هۆشبەرەکان ناگرێتەبەر و لە چەند هەفتەی ڕابردوودا هێزێکی دەریایی گەورەی ڕەوانەی کەناراوەکانی ڤەنزوێلا کردووە بۆ ئەنجامدانی ئۆپەراسیۆنێک  دژی  بازرگانانی ماددە هۆشبەرەکان.