زیاتر لە 30 کۆمپانیای ئەمریکی دەیانەوێت وەبەرهێنان لە هەرێمی کوردستان فراوانتر بکەن

ئاڤا نیوز

جێگری سەرۆكی ژووری بازرگانیی ئەمریكا تایبەت بۆ ئاڤا ڕایدەگەیەنێت، كۆمپانیا ئەمریكییەكان مەبەستیانە ئاستی كارەكانیان لە هەرێمی كوردستان لە سەرجەم سێكتەرەكاندا فراوانتر بكەن. ستایشی ڕۆڵی سەرۆكوەزیران مەسرور بارزانیش دەكات بۆ هەوڵەكانی لەپێناو فرەچەشنكردنی ئابووریی هەرێمی كوردستان.

چیرۆكی سەرەكی: شاندێكی ژووری بازرگانیی ئەمریكا و ژمارەیەك وەبەرهێنەری ئەمریكی كە لە 32 كۆمپانیا پێكهاتوون، هاتوونەتە شاری هەولێر، ئامانجی سەردانەكەیان بۆ فراوانكردنی وەبەرهێنانە لە بوارە جۆراوجۆرەكاندا.

لێدوانی فەرمی: ستیڤ لوتز، جێگری سەرۆكی ژووری بازرگانیی ئەمریكا، لە لێدوانێكی تایبەتدا بۆ ئاڤا ڕایگەیاند، سەردانەكەی ئەم دواییەی سەرۆكوەزیران مەسرور بارزانی بۆ ئەمریكا، بەدڵنیاییەوە ڕێگەی لەبەردەم تێڕوانینی كۆمپانیا ئەمریكییەكان كردەوە، هاتنی كۆمپانیاكان بە پاڵپشتی و پشتگیریی وەزارەتی بازرگانیی ئەمریكایە و هیوا دەخوازم ئەو ڕێككەوتنانەی لێرە دەكرێن، لەلایەن وەزارەتی بازرگانیی ئەمریكاوە بەفەرمی پەسەند بكرێن.

زانیاریی زیاتر: ئەو کۆمپانیا ئەمریكییانەی هاتوونەتە هەرێمی كوردستان، لە بوارەكانی بەرهەمهێنانی غاز، تەكنەلۆژیا، تەندروستی و كشتوكاڵ كاردەكەن و بەدوای دەرفەتی بازرگانی نوێوەن و دەیانەوێت بزانن ژینگەی وەبەرهێنان لە هەرێمی كوردستان چۆنە، ئەوە بە گوتەی ستیڤ لوتز سەرۆكی شاندە ئەمریكییەكە.

لەلایەكی دیكەوە: جێگری سەرۆكی ژووری بازرگانیی ئەمریكا دووپاتیشی كردەوە، بەخۆشحاڵییەوە پێشوازی لە وەبەرهێنەرانی هەرێمی كوردستانیش دەكەین كە بەرهەم و كاڵاكانیان هەناردەی ئەمریكا بكەن؛ بەرهەمی گرنگ لە كوردستاندا هەن، بەنموونە هەنگوین كە زۆر بەتامە و كوالێتیشی بەرزە.