وەزیری كشتوكاڵ: بۆ گواستنەوەی بەرهەمی جووتیاران لەگەڵ بەغدا گەیشتووینەتە ڕێككەوتن

ئاڤا نیوز

وەزیری كشتوكاڵ و سەرچاوەكانی ئاوی هەرێمی كوردستان ڕایدەگەیەنێت، ئێستا هەردوو حكومەتی هەرێمی كوردستان و فیدڕاڵ، ڕۆژژمێرێكی كشتوكاڵی هاوبەش پەیڕەو دەكەین و، لە بابەتی گواستنەوەی بەرهەمە كشتوكاڵی و ئاژەڵییەكان بۆ ناوەڕاست و خوارووی عێراق، بە تەواوی گەیشتووینەتە ڕێككەوتن. 

وێنە گەورەكە: سەرەڕای چەندین ڕێككەوتنی نێوان هەردوو وەزارەتی كشتوكاڵی هەرێمی كوردستان و عێراق بۆ كارئاسانیی گواستنەوەی بەرهەمی جووتیارانی هەرێمی كوردستان بۆ پارێزگاكانی عێراق، بەڵام لە بازگەكان گرفت بۆ تێپەڕبوونی بارهەڵگرەكان دروست دەكرێت؛ لە بەشێك لە بازگەكان داوای باجی زۆر دەكرێت و هەندێكجاریش بارهەڵگرەكان بە بارەكانیانەوە بۆ ماوەیەكی زۆر لە بازگەكان دەهێڵدرێنەوە.

لێدوانی فەرمی: بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان لە كۆنفرانسێكی ڕۆژنامەوانیدا ڕایگەیاند، بۆ گواستنەوەی بەرهەمی جووتیارانی هەرێمی كوردستان بۆ ناوەڕاست و خوارووی عێراق، بە تەواوی لەگەڵ بەغدا گەیشتووینەتە ڕێككەوتن و ئێستا ڕۆژژمێرێكی هاوبەش پەیڕەو دەكەین.

دووپاتیشی كردەوە، ئەو گرفتانەی لە ساڵانی ڕابردوودا هەمانبوو بە ڕێژەیەكی زۆر چارەسەر بووە.

لەلایەكی دیكەوە: وەزیری كشتوكاڵی هەرێمی كوردستان باسی لەوەشكرد، حكومەتی هەرێمی كوردستان كاری جددی كردووە بۆ بە بڕاندكردن و بەبازاڕكردنی بەرهەمە ناوخۆییەكان و دۆزینەوەی بازاڕ بۆ بەرهەمەكان. كارئاسانیی پێویستیش بۆ هەناردەكردنی بەرهەمی جووتیاران دەكەین.