جەمال کۆچەر: عێراق دووچاری قەیرانی ئابووری دەبێت

ئاڤا نیوز

تاوەکو ئێستا هەولێر و بەغدا لەسەر پرسی مووچەی مووچەخۆرانی هەرێمی کوردستان نەگەیشتوونەتە ڕێکەوتن و ئەندامێکی لیژنەی دارایی ئەنجوومەنی نوێنەرانی عێراقیش دەڵێت: عێراق دەکەوێتە قەیرانی ئابوورییەوە.

وێنە گەورەکە: حکومەتی هەرێمی کوردستان بەردەوامە لە ئەنجامدانی پابەندییەکانی بەرامبەر حکومەتی عێراق لەبارەی پرسی مووچە، یەکێک لە ئەرکەکانی ناردنی لیستی مووچەیە، هەرچەندە هێشتا دەست بە هەناردەکردنەوەی نەوت نەکراوە، بەڵام مانگانە وەزارەتی دارایی کوردستان لیستی مووچە بۆ بەغدا دەنێرێت، بۆ ئەوەی لەسەر لیستی مووچە ناردنی پارەی مووچەی مووچەخۆران دوانەکەوێت.

لێدوانی فەرمی: جەمال کۆچەر، ئەندامی لیژنەی دارایی ئەنجوومەنی نوێنەرانی عێراق بە ئاڤای ڕاگەیاند: پێویستە هەولێر و بەغدا چارەسەرێک بۆ  مووچە و کێشەکانی دیکەی نێوانیان بدۆزنەوە، بابەتەکە هەرچەند درێژە بکێشێت ئەوا کێشەکان زیاتر دەبن، بۆیە هیوادارم حکومەتی هەرێمی کوردستان بە هەر شێوەیەک بێت بابەتی مووچە یەکلایی بکاتەوە.

زانیاریی زیاتر: بە گوتەی جەمال کۆچەر، عێراق دەچێتە قەیرانێکی ئابوورییەوە و نابێت مووچە ببێتە بابەتی ڕێککەوتنی ئەم مانگە و مانگەکانی داهاتوو، بەڵکو پێویستە بە تەواوی چارەسەر بکرێت و مووچەی مووچەخۆرانی کوردستان بەتەواوی یەکلایی ببێتەوە.

"باشترین کار کە حکومەتی هەرێمی کوردستان بیکات، ئەوەیە بەر لەوەی عێراق بچێتە نێو ئەو قەیرانە ئابوورییەوە، بەزوویی تەواوی کێشەکانی بەردەم مووچە چارەسەر بکات."