عێراق پەرە بە کێڵگە نەوتییەکانی ناسرییە و کەرکووک دەدات

ئاڤا نیوز

وەزارەتی نەوتی عێراق بە مەبەستی پەرەپێدان بە کێڵگە نەوتییەکان لە پارێزگای ناسرییە و کەرکووک، گرێبەستی گەورە لەگەڵ کۆمپانیا جیهانییەکان واژۆ دەکات.

چیرۆکی سەرەکی: بەمەبەستی پەرەپێدان بە کەرتی نەوت، وەزارەتی نەوتی عێراق، گرێبەستی گەورەی لەگەڵ کۆمپانیا جیهانییەکاندا واژۆ کردووە بۆ پەرەپێدانی کێڵگە نەوتییەکان لە ناسرییە و کەرکووک، ئێستا وەبەرهێنانی غازی عێراق %70ـیە لە سەرجەم کێڵگەکان.

لێدوانی فەرمی: باسم خوزەیر، بریکاری وەزارەتی نەوت، لە وتارێکدا لە میانی کردنەوەی سێیەمین پێشانگای نێودەوڵەتی نەوت و غاز ڕایگەیاند: دوێنێ کۆتاییمان بە کۆڕبەندی نێودەوڵەتی وزە هێنا، ئەم دەستکەوتانەی حکومەت بەدەستی دێنێت پەیامێکی ڕوونە بۆ سەرجەم وڵاتانی هەرێمایەتی و وەبەرهێنەران کە عێراق توانیویەتی ژینگەیەکی وەبەرهێنانی سەرنجڕاکێش بۆ پیشەسازیی نەوت فەراهەم بکات."

زانیاریی زیاتر: بە گوتەی خوزەیر، وەزارەتی نەوت ئێستادا بازدانێکی گەورەی لە پیشەسازیی نەوتدا بەدەست هێناوە لە دەرهێنان، پاڵاوتن، غاز و دابەشکردن.

لەلایەکی دیکەوە: بریکاری وەزارەتی نەوت ئاماژەی بەوەش کرد، چەند ڕۆژێک لەمەوبەر گرێبەست لەگەڵ کۆمپانیای (شیڤرۆن) واژۆ کرا بۆ چوار بلۆک لە کێڵگەی ناسرییە و کێڵگەی بەلەد، ماوەیەک لەمەوبەریش گرێبەستێکی گەورەمان لەگەڵ کۆمپانیای جیهانی (BP)ـی بەریتانی واژۆ کرد بۆ وەبەرهێنانی چوار کێڵگە لە کەرکووک، جگە لە پڕۆژە گەورەکەی کە حکومەت چاوەڕێی دەکرد و واژۆی کرد، ئەویش پڕۆژەی (Gi Gib) پڕۆژەی پەرەپێدانی گازی یەکگرتووە لە کێڵگەی ئەرتاوی.