بەهۆی کارەباوە كارگه‌ی ئاردی شێخان سزا دراوە و خاوه‌نه‌كه‌ی به‌ نایاسایی ده‌زانێت

ئاڤا نیوز

له‌ شێخان، كارگه‌یه‌كی به‌رهه‌مهێنانی ئارد ماوه‌ی چوار مانگه‌ كاره‌بای نیشتمانی لێ بڕدراوه‌ و به‌ بڕی 216 ملیۆن دیناریش سزادراوه‌، له‌كاتێكدا خاوه‌نی كارگه‌كه‌ سه‌رجه‌م قه‌رزه‌كانی كاره‌بای داوه‌ و بڕیاره‌كه‌ی دادگاش له‌ به‌رژه‌وه‌ندی ئه‌ودایه‌.

چیرۆکی سەرەکی: كارگه‌ی ئاردی شێخان ماوه‌ی حه‌وت ساڵه‌ دامه‌زراوه‌ و مانگانه‌ ئارد بۆ 18 هه‌زار خێزان به‌رهه‌م ده‌هێنێت. شه‌ش ساڵ له‌مه‌وبه‌ر، به‌ڕێوه‌به‌رایه‌تیی كاره‌بای شێخان پێوه‌ری زیره‌كی كاره‌بایان بۆ به‌ستووه‌ و ئه‌وانیش هه‌موو مانگێك پسوولەی كاره‌بایان داوه‌. به‌ڵام به‌ گوتەی ئەو، بڕی پاره‌ی پسوولەکان زۆر كه‌م بووه‌ به‌ به‌راورد له‌گه‌ڵ بڕی به‌كارهێنان.

لێدوانی فەرمی: حه‌جی خه‌تاب زێباری، خاوه‌نی كارگه‌ی ئاردی شێخان، به‌ ئاڤای ڕاگه‌یاندووه‌، كارگه‌كه‌یان هیچ قه‌رزێكی كاره‌بای له‌سه‌ر نییه‌، به‌ڵام به‌ڕێوه‌به‌رایه‌تیی كاره‌بای شێخان به‌ بیانووی فێڵكردن و دزینی كاره‌با، سزای 216 ملیۆن دیناریان به‌سه‌ردا سه‌پاندووه‌.

چه‌ند مانگێك پێش ئێستا، به‌ڕێوه‌به‌رایه‌تیی كاره‌بای شێخان به‌مه‌ی زانیوه‌ و گومانی ئه‌وه‌یان لای دروستبووه‌ ده‌ستكاری پێوه‌ره‌كه‌ كرابێت، بۆیه‌ لیژنه‌یه‌كیان پێكهێناوه‌ و به‌ ته‌خمین بڕی 216 ملیۆن دیناریان وه‌ك سزای گشتی به‌سه‌ر كارگه‌كه‌دا سه‌پاندووه‌.

له‌سه‌ر بنه‌مای ڕه‌تكردنه‌وه‌ی دانانی ئه‌م سزایه‌ له‌لایه‌ن خاوه‌نی كارگه‌كه‌وه‌، به‌ڕێوه‌به‌رایه‌تیی كاره‌بای شێخان كاره‌بای نیشتمانییان له‌سه‌ر بڕیوه‌ و سكاڵایان له‌ دادگا تۆمار كردووه‌. سه‌ره‌ڕای ئه‌وه‌ی بڕیاری دادگا له‌ به‌رژه‌وه‌ندیی كارگه‌كه‌ ده‌رچووه‌ و دواتر دادگا فه‌رمانێكی "ئه‌مر وه‌لائی"شی بۆ گه‌ڕاندنه‌وه‌ی كاره‌با ده‌ركردووه‌، به‌ڵام هێشتا بڕیاره‌كه‌ جێبه‌جێ نه‌كراوه‌.

لەلایەکی دیکەوە: خاوەنی کارگەکە سه‌ردانی وه‌زاره‌تی كاره‌بای كردووه‌ و له‌وێ پێیان گوتووە، سزای ته‌خمین ته‌نیا بۆ دوو بارە: یه‌كه‌م، ئه‌گه‌ر كاره‌با به‌ نایاسایی ڕاكێشرابێت. دووه‌م، پێوه‌ری كاره‌با لێكرابێته‌وه‌ یان سووتابێت، كه‌ هیچ كامیان له‌سه‌ر كارگه‌كه‌یان نییه‌. بۆیه‌ داوا له‌ حكومه‌ت ده‌كات كێشه‌كه‌ی بۆ چاره‌سه‌ر بكات.

بۆچوونی لایەنی بەرامبەر: نافع مسته‌فا، به‌ڕێوه‌به‌ری كاره‌بای شێخان، به‌ ئاڤای وت، "كارگه‌كه‌ سه‌رپێچیی له‌سه‌ر تۆڕی كاره‌بای نیشتمانی كردووه‌ و كێشه‌ له‌ پێوه‌ری زیره‌كی كارگه‌كه‌ هه‌بووه‌." جه‌ختیشی له‌وه‌ كرده‌وه‌ كه‌ پێویسته‌ ئه‌و بڕه‌ پاره‌یه‌ بدات، جا چ به‌ كاش بێت یان به‌ قیست.