عێراق و ئێران لەسەر 13 خاڵ سەبارەت بە دەروازە سنورییەکان ڕێکدەکەون

ئاڤا نیوز

دەستەی دەروازە سنوورییەکانی عێراق ئاشکرای کرد، لەگەڵ لایەنی ئێرانی لەسەر چەند خاڵێکی تایبەت بە دەروازە سنورییەکانی نێوان هەردوو وڵات ڕێککەوتوون، بەپێی ئەو ڕێککەوتنە لە مەودوا تاران بەبێ گەڕانەوە بۆ حکومەتی عێراق نابێت هیچ دەروازەیەکی سنووری نوێ بکاتەوە.

چیرۆکی سەرەکی: ئەمڕۆ دووشەممە، 2025-09-08، پێنجەمین کۆبوونەوەی هاوبەشی نێوان شاندی فەرمی دەستەی دەروازە سنوورییەکانی عێراق و ئێران لەتاران بەڕێوەچوو.

ڕاگەیێنراوی فەرمی: دەستەی دەروازە سنوورییەکانی عێراق بڵاوی کردەوە: لە کۆبوونەوەکەدا هەردوو لایەنی عێراقی و ئێرانی لەسەر دابینکردنی مانیفێستی ئەلیکترۆنی تایبەت بە کاڵای هاوردەکراو بۆ عێراق پێش گەیشتنی بەدەروازە سنورییەکان ڕێککەوتن، بەو مەرجەی مانیفێستەکە هەموو  داتا و زانیاری بار و کێش و ژمارەی بەڵگەنامە گومرگییەکان لەخۆبگرێت.

زانیاریی زیاتر: بەپێی ڕاگەیێنراوەکە هەردوولا لەسەر چڕکردنەوەی زانیاری هەواڵگری و ئاڵوگۆڕی زانیاری ئەمنی و ڕێگریکردن لە هەناردەکردنی ئەو ماددانەی کە لەلایەن دەسەڵاتدارانی عێراقەوە قەدەغەکراون ڕێککەوتن.

ئەمەش بزانە: بەپێی ڕێککەوتنەکە لە مەودوا تاران بەبێ گەڕانەوە بۆ حکومەتی عێراق نابێت هیچ دەروازەیەکی سنووری نوێ بکاتەوە.