ئیسرائیل جارێکی دیکە سووریا بۆردومان دەکات

ئاڤا نیوز

ئاژانسی هەواڵی  سووریا (سانا) بڵاویکردەوە، هێرشەکانی ئیسرائیل ناوچەکانی دەوروبەری شاری حومس و  لازقیەیان لە سووریا کردووەتە ئامانج.

زانیاری بەدەستهاتوو: میدیاکانی سووریا  بڵاویانکردەوە، درەنگانی شەوی ڕابردوو جارێکی دیکە سوپای ئیسرائیل پارێزگای حومس و لازقیەی بۆردومان کرد و هەر بەپێی میدیاکان هێرشەکان بۆ سەر چەند شوێنێکی سەربازی بوون و تاوەکو ئێستا زیانەکانیان ئاشکرا نەکراوە.

بڵاوکراوەی فەرمی: هەر دوای هێرشەکە، وەزارەتی دەرەوەی سووریا لە بەیاننامەیەکدا ئیدانەی هێرشەکانی کرد و ڕایگەیاند: هێرشەکانی ئیسرائیل پێشێلکردنی سەروەری سووریان، هاوکات  داوای لە ئەنجوومەنی ئاسایش و کۆمەڵگەی نێودەوڵەتی کرد، هێرشەکانی ئیسرائیل ڕابگرن.

ئەوەی پێویستە بیزانیت: سوپای ئیسرائیل لە باشووری حومسی بۆمباران کردووە،  کە کۆگای تەقەمەنی هێزە چەکدارەکانی سووریا و قوتابخانەیەکی بەرگریی ئاسمانی لێیە.

قووڵتر: ئەم بەئامانجگرتنە لە کاتێکدایە کە بڕیارە ئەم هەفتەیە ڕۆن دیرمەر، وەزیری کاروباری ستراتیژی ئیسرائیل لەگەڵ ئەسعەد شەیبانی، وەزیری دەرەوەی سووریا بۆ تاوتوێکردنی کەمکردنەوەی گرژییەکانی باشووری سووریا بەنێوەندگیری ئەمریکا کۆببێتەوە.