لە دوبەی کۆنفڕانسێکی تایبەت بە وەبەرهێنان لە کوردستان بەڕێوەدەچێت

ئاڤا نیوز

شاندێکی دەستەی وەبەرهێنانی هەرێمی کوردستان دەچێتە ئیمارات و بە بەشداری ژمارەیەک کۆمپانیای وڵاتەکە، کۆنفرانسێکی تایبەت بە وەبەرهێنان لە کوردستان بەڕێوەدەچێت.

وێنە گەورەکە: تا دێت کەرتی وەبەرهێنان لە هەرێمی کوردستان دەبووژێتەوە و بەرەوپێشچوونی زیاتر بەخۆیەوە دەبینێت، بەمەش کۆمپانیا گەورەکانی جیهان و وڵاتانی ناوچەکە بۆ وەبەرهێنان ڕوو لە کوردستان دەکەن، هەر لەم چوارچێوەیەشدا سبەی چوارشەممە کۆنفڕانسێکی تایبەت بە وەبەرهێنان لە هەرێمی کوردستان لە شاری دوبەی - ئیمارات بە پاڵپشتیی ڕێکخراوی دراوی نێودەوڵەتیی بەڕێوەدەچێت. 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤای وت: زیاتر لە 21 کۆمپانیای ئیماراتی لە سێکتەرەکانی کشتوکاڵ، پیشەسازی و وزەی نوێبووەوە و چەند سێکتەرێکی دیکە بەشداریی دەکەن، سیمیناری تایبەت بە وەبەرهێنان لە هەرێمی کوردستان بەڕێوەدەچێت. 

گۆشەیەکی دیکەی دیمەنەکە: دەستەی وەبەرهێنان لەڕێگەی کۆمەڵێک دیدار و کۆبوونەوەیان لەگەڵ کۆمپانیاکانی ئیمارات، دەیەوێت وەبەرهێنەر و وەبەرهێنانی وڵاتەکە زیاتر ئاشنای دەرفەتەکانی وەبەرهێنان بن لە کوردستان، تاوەکو پرۆژەکانیان بهێننە کوردستان و سەرمایەکانیان لێرە بخەنە گەڕ.

بۆچی گرنگە: کەرتی وەبەرهێنان دەتوانێت ئابووریی هەرێمی کوردستان زیاتر ببووژێنێتەوە و بەرەوپێشچوونی زیاتر لە شار و ناوچەکان تۆمار بکات، هەروەها کوردستان زیاتر بە ڕووی جیهاندا دەکاتەوە و هەزاران هەلی کار بۆ هاونیشتمانیان دابین بکات.