بڕیاری پێدانی زەوی بە فەرمانبەرانی گرێبەست دەچێتە باری جێبەجێکردن

ئاڤا نیوز

لە ئەمڕۆوە بڕیاری دابەشکردنی زەوی بەسەر فەرمانبەرانی گرێبەست دەچێتە باری جێبەجیکردنەوە و هەر فەرمانبەرێکی گرێبەست مەرج و ڕێنمای پێدانی زەوی بیگرێتەوە پارچەیەک زەوی نیشتەجێبوونی لە سنووری شارەوانی خۆی پێدەدەرێت. 

چیرۆکی سەرەکی: ئەمڕۆ چوارشەممە، ژمارە 340ـی رۆژنامەی وەقایعی کوردستان (رۆژنامەی فەرمی هەرێمی کوردستان) بڵاوکرایەوە، ئەم ژمارەیەیەی ڕۆژنامەکە، ژمارەیەک بڕیار و ڕێنماییە یاسایی و کارگێڕییەکان لەخۆ دەگرێت، کە لەلایەن وەزارەت و دەزگاکانی حکومەتی هەرێمی کوردستانەوە دەرکراوون و پەیوەندییان بە چەند بوارێکی گرنگی کارگێڕیی و خزمەتگوزاریەوە هەیە.

بڵاوکراوەی فەرمی: ئەم ژمارەیەی وەقایعی کوردستان، هەموواری دووەمی ڕێنمایی دابەشکردنی زەوی بەسەر فەرمانبەران لە هەرێمی کوردستان بڵاوکراوەتەوە، بەپێی ئەم هەمووارە، فەرمانبەرانی هەمیشەیی و گرێبەست لە لایەنە فەرمییەکانی هەرێمی کوردستان لە بواری راژەی مەدەنی و سەربازی و هێزەکانی ئاسایشی ناوخۆ، کە مەرج و ڕێنمایی پێدانی زەوی دەیانگرێتەوە، پارچەیەک زەوییان پێدەدرێت، ئەم ڕێنماییەش لە ئەمڕۆوە دەچێتە باری جێبەجێکردن.

لێدوانی فەرمی: سەربەست مەولوود، سەرپەرشتیاری تیمی وردبینیی پڕۆسەی دابەشکردنی زەوی له‌ وه‌زاره‌تی شاره‌وانی بە ئاڤای گوت: دوای دەرچوونی ڕێنماییەکە لە وەقایعی کوردستان، پێدانی زەوی بە فەرمانبەرانی گرێبەست دەچێتە باری جێبەجێکردن، بۆ ئەم مەبەستەش داوای داتا و زانیاری و وردەکاری لەسەرجەم وەزارەتەکان کراوە، بۆئەوە ڕێنمایی و ڕێککارەکان و چۆنیەتی پڕکردنەوەی فۆرم و وردەکارییەکانی دیکەی پرۆسەکە بڕیاریاریان لەسەر بدرێت و جێبەجێ بکرێن.

ئەمەش بزانە: بە بڕیاری سەرۆکوەزیران مەسرور بارزانی، لە کابینەی نۆیەم دابەشکردنی زەوی بەسەر فەرمانبەران بڕیاریی لەسەر دراو کەوتە باری جێبەجێکردن و هەموو ئەو فەرمانبەرانەی مەرجەکان دەیانگرێتەوە زەویان پێدەدرێت.