وەزارەتی ناوخۆی عێراق: ئاسایشی سنوورەکان نیوەی ئارامیی عێراقە

ئاڤا نیوز

وەزارەتی ناوخۆی عێراق ڕایدەگەیێنێت، پاراستنی سنوورەکان نیوەی ئاسایشە و حکومەت لە باشترین ئاستی ئامادەباشیدایە بۆ ڕێگریکردن لە هەر جۆرە هەڕەشەیەکی تیرۆریستی بۆ سەر خاکی وڵات.

لێدوانیی فەرمی: عەقید میقداد میری، بەڕێوەبەری پەیوەندییەکان و ڕاگەیاندن لە وەزارەتی ناوخۆی عێراق بە ئاژانسی هەواڵی عێراقی ڕاگەیاند، پاراستنی سنوورەکان نیوەی ئارامیی وڵات پێکدەهێنێت و حکومەت بەردەوامە لە دابینکردنی هەموو جۆرە پاڵپشتییەکی دارایی و سەربازی بۆ هێزەکان.

- "وەزارەتی ناوخۆ ئێستا لە باشترین ئاستی ئامادەباشیدایە و هێزە ئەمنییەکان بەوپەڕی تواناوە ئەرکەکانیان بۆ پاراستنی سەرانسەری سنوورە نێودەوڵەتییەکانی عێراق بە وردی جێبەجێ دەکەن".

زانیاریی زیاتر: بەڕێوەبەری پەیوەندییەکان و ڕاگەیاندن لە وەزارەتی ناوخۆی عێراق ئاماژە بەوەش دەدات، تەواوی گەلی عێراق پشتیوانی لە هێزەکانی پاسەوانی سنوور و سوپا دەکەن، حەشدی شەعبیش وەک هێزێکی پاڵپشت ڕۆڵێکی گەورە لە پاراستنی ئاسایشی نیشتمانیی وڵاتدا دەگێڕێت.

باکگراوند: لەماوەی ڕابردوودا مەبەستی پاراستنی سنوورەکانی عێراق و سووریا، بەهۆی پەرەسەندنە سەربازییە خێراکانی ناوخۆی سووریا و ترسی دزەکردنی تووندڕەوەکان و چەکدارانی داعش لەو زیندانانەی کەوتوونەتە ناوچە سنوورییەکان، عێراق هێزێکی ئەمنیی زۆری لەسەر ناوچە سنوورییەکان لەگەڵ سووریا کۆکردووەتەوە.