سەرۆکوەزیران مەسرور بارزانی پێشانگای وەبەرهێنان و خانووبەرە دەکاتەوە

ئاڤا نیوز

بە ئامادەبوونی مەسرور بارزانی، سەرۆکوەزیرانی کوردستان، شەشەمین پێشانگای نێودەوڵەتیی خانووبەرە و وەبەرهێنان لە شاری هەولێر کرایەوە.

چیرۆکی سەرەکی: لە پێشانگای نێودەوڵەتیی خانووبەرە و وەبەرهێنان لە هەولێر، 280 کۆمپانیا لە 16 وڵاتی جیهانەوە بەشدارییان کردووە، ماوەی چوار ڕۆژ بەردەوام دەبێت و لە کاتژمێر 10:00ـی بەیانی تاوەکو 6:00ـی ئێوارە کراوە دەبێت، پێشانگاکە دەرفەتێکە بۆ ئەوەی کۆمپانیا جیهانییەکان ڕوو لە کوردستان بکەن، سەرمایەکانیان بخەنەگەڕ و وەبەرهێنان بکەن.

ئەوەی پێویستە بیزانیت: مەسرور بارزانی، سەرۆکوەزیرانی کوردستان پێشانگاکەی کردەوە و تەواوی بەشەکانی بەسەرکردەوە، هاوکات پاڵپشتیی تەواوەتی خۆی بۆ کارەکانی پێشانگەکە و کۆمپانیاکان دووپات کردەوە. 

بۆچی گرنگە: پێشانگای وەبەرهینان و خانووبەرە کاریگەریی ئەرێنی لەسەر جووڵەی بازار دەبێت، هاوکات هەزاران هاونیشتمانی سوود لەو داشکانانە وەردەگرن کە لەلایەن پرۆژە بەشداربووەکانی پێشانگاکەوە پێشکەش دەکرێن.

باکگراوند: ساڵی ڕابردوو زیاتر لە 260 کۆمپانیای ناوخۆیی و نێودەڵەتی بەشدارییان لە پێشانگاکەدا کرد، لە چوار ڕۆژدا نزیکەی 60 هەزار هاووڵاتی سەردانیان کرد و زیاتر لە 280 گرێبەست واژۆ کران.