گرێبەستی چارەسەرکردنی ئاوەڕۆی هەولێر واژۆ کرا

ئاڤا نیوز

ئەمڕۆ لە هەولێر گریبەستی پڕۆژەیەکی ستراتیژی واژۆ کرا، لەماوەی سێ ساڵدا بەشی یەکەمی چارەسەرکردنی ئاوەڕۆی قورسی هەولێر لەلایەن کۆمپانیایەکی یابانی جێبەجێ دەکرێت و ئەو بەشانەی دەمێنێتەوە لەلایەن کۆمپانیای ناوخۆیی و لەسەر بودجەی حکومەتی هەرێمی کوردستان جێبەجێ دەکرێت.

وێنە گەورەکە: ئاوەڕۆی هەولێر لە چوار دەروازەوە دەردەچێت، لەگەڵ ئەوەی ژینگە پیس دەکات، کاریگەریی خراپی لەسەر تەندروستیی گشتی هەیە.

لێدوانی فەرمی: ساسان عەونی، وەزیری شارەوانی و گەشتوگوزار ڕایگەیاند، پڕۆژەکە بۆ چارەسەرکردنی بەشێک لە ئاوەڕۆی هەولێرە، پڕۆژەکە بە قەرزی IPQ23 ناسراوە، بە گوژمەی نزیکەی 230 ملیۆن دۆلار لە ڕێگای ئاژانسی جایکاوە جێبەجێ دەکرێت. دوای چارەسەکردنی ئەو ئاوە بەکاردەهێنرێتەوە بۆ ئاودانی باخچە و بواری جیاوازی دیکە.

وەزیری شارەوانی ئەوەش دەڵێت: موژدەی ئەوە ڕادەگەیەنم، بەبڕیاری سەرۆکوەزیران مەسرور بارزانی، ئەو بەشانەی پڕۆژەکە دەمێننەوە لەسەر بودجەی حکومەت و بە توانای کۆمپانیای ناوخۆیی جێبەجێ دەکرێت.

وەزیری شارەوانی ئەمانەشی وت:

-    ماوەی 10 ساڵە دانوسان لەسەر ئەم پڕۆژەیە دەکرێت.

-    پڕۆژەکە بۆ کۆمپانیای (ئیتۆچۆی یابانی) دەرچووە.

-    ئاوەڕۆی قورسی هەولێر ڕۆژانە نزیکەی 318 مەتر سێجایە بەشێکی زۆری ئەو ئاوە قورسە لە چوار درەوازەوە لە گوندی توڕەق بۆ گوندی عارەب کەند دەڕوات.

-    دیزاینی پڕۆژەکە بۆ چارەسەرکردنی ئەو قەبارەیە لە ئاوەڕۆ ئامادەیە.

-     پڕۆژەکە دابەشی سەر هەشت فەیس کراوە، هەر فەیسێک دابەشی سەر دوو بەش کراوە، واتا کۆی پڕۆژەکە لە 16 بەش پێکدێت، هەر بەشێک توانای چارەسەرکردنی 52 هەزار مەتر سێجا ئاوی ڕۆژانەی هەیە.
-    ئەمڕۆ واژۆی گرێبەستی یەک بەش لەو 16 بەشە کرا.

-    ئەو ئاوەی دەپاڵێورێت بۆ ئاودانی سەوزایی بەکاردەهێنرێتەوە.

لەلایەکی دیکەوە: ئومێد خۆشناو، پارێزگاری هەولێر لە وتاری واژۆکردنی گرێبەستەکە وتی، هەولێر دەبێتە یەکەم شاری عێراق بۆ چارەسەرکردنی ئاوەڕۆی قورس. بەناوی خەڵکی هەولیر و پارێزگای هەولێرەوە سوپاسی باڵیۆز و کونسوڵی یابان دەکەین.