دەستەی خانەنشینی عێراق: وەزارەتی دارایی هۆکاری دواکەوتنی مووچەی خانەنشینانە

ئاڤا نیوز


سەرۆکی دەستەی گشتیی خانەنشینی عێراق دەڵێت، هۆکاری دواکەوتنی ئەم دواییەی مووچەی خانەنشینانی وەزارەتی دارایی بووە و پەرلەمانتارێکیش داوای "دوورخستنەوەی هاووڵاتییانی کوردستان لە ململانێ سیاسییەکان دەکات".


وێنە گەورەکە: بەهۆی کەمی پارەی نەختینەوە، عێراق بە گەورەترین قەیرانی دارایی تێدەپەڕێت و پاشەکشەی حکومەت بۆ دابینکردنی مووچەی فەرمانبەران و خانەنشینان زیادی کردووە، ئەمەش وایکردووە چەند مانگێک بەردەوام مووچەی فەرمانبەران و خانەنشینان لەوادەی خۆیدا دوا بکەوێت. 

لێدوانی فەرمی:  مستەفا گەرعاوی، پەرلەمانتاری عێراق، ڕایگەیاند: سەبارەت بە دواکەوتنی مووچەی خانەنشینان، میوانداری سەرۆکی دەستەی خانەنشینیمان کرد و پێی ڕاگەیاندین کە سندوقی خانەنشینی ئێستا تەنیا 30%ی مووچەی خانەنشینان دەدات و دواکەوتنی ئەم دواییەی مووچەی خانەنشینان لە وەزارەتی داراییەوە بووە.

زانياريی زياتر: گەرعاوی ئاماژەی بەوەکرد، هەرچەندە مووچەی کارمەندانی حکومەت تا کۆتایی ساڵ دابین کراوە، بەڵام خەزێنەی گشتیی دەوڵەت پارەیەکی ستراتیژیی پێویستی تێدا نییە و حکومەتیش دان بە قەیرانی نەختینەییدا نانێت.

ئەمەش بزانە: ئەو ئەندام پەرلەمانەی عێراق داوای دوورخستنەوەی مووچەی هاووڵاتییانی کوردستانی لە ململانێی سیاسیی کرد و وتی "بەکار‌هێنانی فەرمانبەرانی کوردستان وەک کارتێکی سیاسی، زوڵمێکی گەورەیە".