پرسی مووچە لە کۆبوونەوەی ئەنجوومەنی وەزیرانی عێراق گفتوگۆی لەسەر دەکرێت

ئاڤا نیوز

ئەگەرچی لە کارنامەی دانیشتنی ئەنجوومەنی وەزیرانی عێراق پرسی مووچەی فەرمانبەران دانەنرا بوو، بەڵام وەک چەند جاری پێشوو لە پەراوێزی کۆبوونەوەکە سەرۆکوەزیرانی عێراق ئەو پرسەی خستە گفتوگۆی کۆبوونەوەکە.

زانیاریی تایبەت: سەرچاوەیەک لە ناو کۆبوونەوەی ئەنجوومەنی وەزیرانی عێراق بۆ ئاڤا میدیا ڕایگەیاند: ئێستا لە کۆبوونەوەی ئەنجومەنی وەزیرانی عێراق تاوتوێی پرسی ناردنی مووچە و ڕێککەوتنی کۆتایی لەسەر دۆسیەی نەوت و داهاتە نانەوتییەکانی هەرێمی کوردستان دەکرێت.

زانیاریی زیاتر: لە ئەگەری بڕیاردان و ڕەزامەندی نیشاندان لەسەر کۆنووسەکانی نەوت و داهاتی ناوخۆ، ئاستەنگەکانی بەردەم ناردنی کێشەی مووچە بۆ مانگەکانی حەوت و هەشت و مانگەکانی دواتر نامێنێت، هەر لەم مانگەشدا هەناردەی نەوت دەستپێدەکاتەوە.

لەلایەکی دیکەوە: ئەمڕۆ سەرۆکوەزیران مەسرور بارزانی ڕایگەیاند: بەردەوام لە هەوڵدابووین بۆ چارەسەركردنی كێشەكانی نێوان هەرێمی کوردستان و بەغدا، ئێستا گفتوگۆی نێوان شاندی هەرێمی کوردستان و بەغداد بەردەوامەو لەسەر داهاتی نا نەوتی گەیشوینەتە قۆناغی كۆتایی.

ئەوەی پێویستە بیزانیت: ئەمڕۆ سێشەممە، د.ئومێد سەباح، سەرۆکی دیوانی ئەنجومەنی وەزیرانی هەرێمی کوردستان ڕایگەیاند، پڕۆپۆزەلێک لەلایەن حکومەتی هەرێمی کوردستان و کۆمپانیا نەوتییەکان ئامادەکراوە و ڕادەستی حکومەتی عێراق کراوە، کۆمپانیاکان داوای گرەنتی نووسراو دەکەن لە حکومەتی عێراق، چاوەڕێین حکومەتی عێراق بە خێرایی وەڵاممان بداتەوە.