هەواڵی کوژرانی بەرپرسانی حەماس لە قەتەڕ ڕەتدەکرێتەوە

ئاڤا نیوز

دوای ئەوەی لە میدیاکانەوە وابڵاوکرایەوە کە ژمارەیەک بەرپرسی باڵای حەماس لە هێرشی ئیسرائیل بۆ سەر باڵەخانەیەک لە قەتەر کوژراون، هەر زوو ئەو زانیارییانە لەلایەن بەرپرسانی باڵای بزووتنەوەکە ڕەتکرایەوە.

 

چیرۆکی سەرەکی: پاشنیوەڕۆی ئەمڕۆ سێشەممە بە بەشداریی چەندین فڕۆکەی سەربازیی هێزی ئاسمانی، ئیسرائیل هێرشی کردە سەر بارەگایەکی بزووتنەوەی حەماس لە وڵاتی قەتەر.

 

زانیاریی زیاتر: سوهەیل هندی، بەرپرسی سیاسیی بزووتنەوەی حەماس ڕایگەیاند، لە هێرشەکەدا کوڕ و یاریدەدەری خەلیل حەیای سەرۆکی شاندی دانوستانکاری حەماس لەگەڵ دوو کەسی دیکەدا کوژراون، بەڵام سەرکردایەتیی بزووتنەوەی حەماس لە هەوڵی تیرۆرکردنەكە ڕزگاریان بووە.

 

لەلایەکی دیکەوە: وەزارەتی ناوخۆی قەتەر ڕایگەیاند، لە ئەنجامی هێرشەکەی ئیسرائیل ئەندامێکی هێزە ئەمنییەکانی قەتەر کوژراوە و ژمارەیەکی دیکەش برینداربوونە.

 

ئەوەی پێویستە بیزانیت: ڕەتکردەوەی هەواڵی کوژرانی بەرپرسانی بزووتنەوەی حەماس لە کاتێکدایە، لەسەرەتادا میدیاکانی ئیسرائیل بڵاویانکردەوە کە لە ئەنجامی کردنە ئامانجی باڵەخانەیەک چوار سەرکردەی دیاری بزووتنەوەی حەماس لە دەوحە کوژران.